Accessibility links

Fälestinnär İzrailneñ Gazadan çigenüen bäyräm itä


Öç kön eçendä İzrail Gazadan çığıp kitte diärgä bula. 21 utarnıñ 4sen genä buşatası qaldı. Çigenü ciñel genä barmıy. Küçenügä qarşı bulğannar belän xärbilär arasında bäreleşlär buldı. Fälestinnär yähüdlärneñ kitüen bäyräm itä.

Fälestin xakimiäte başlığı Mähmüd Abbasnı buş Gaza hawa alanında fälestinnär qarşı aldı:

"Bu könnärdä bez tarixi şatlıq, zur şatlıq kiçeräbez, Gaza Sızığınnan utarlar kitä"

Abbas, fälestinnärneñ sabırlığı arqasında İzrail Gazadan kitä, häm küpmeder waqıt uzğaç, İzrail fälestin cirlärennän tulısınça çigenäçäk, dip däwam itte:

"Bu adım – berençe adım. Barısı da Jenin, Könbatış Yar häm İerusalim belän tämamlanaçaq inşalla."

Fälestin xakimiäte uzğan 5 yıldağı suğış waqıtında cimerelgän yortlarnı torğızırğa yärdäm wäğdä itte, xökümättäge eş urınnarınıñ 5%tı – xärbi çaralarda yaralanıp ğärip qalğannarğa bireläçäk, dide:

"Xalıqqa iminlek häm yaxşı tormış birer öçen xäzer bez ilne, iqtisadnı ayaqqa bastırırğa tieş," dide Abbas.

Çigenüneñ zur öleşe tınıç uzsa da, berniçä utarda xärbi köçlär qarşılıqqa oçradı. Gadidta qarşı toruçılar ğäskärlärgä buyaw häm taşlar attı, qapqağa ut törtte. Başqa ber cirdä polisiägä cärähät yasawçı sıyıqça sibelde. Uzğan çärşämbedän birle meñgä yaqın keşe qulğa alınğan. Gaza sızığındağı qalğan 4 utarnı İzrail sişämbegä qädär çığarıp beterer dip farazlana.

Alsu Qormaş
XS
SM
MD
LG