Accessibility links

чәршәмбе, 7 декабрь 2016, Казан вакыты 13:39

Rim Papası Benedikt möselman yulbaşçıları belän oçraştı


Rim Papası Benedikt, terrorğa qarşı suğışqa möselman yulbaşçıları yärdäm itergä tieş, dip belderde. Katolik çirkäwe başlığı üzeneñ çit ilgä berençe säfären tämamladı. Bügen Germaniäneñ Köln şähärendä anıñ wäğäzen tıñlarğa ayrtı million keşe cıyıldı.

Bügenge doğa qılu belän Kölnda Dönya Yäşlär Köne tämamlandı. Çığışı belän alman bulğan Benedikt yuğarı katolik ruxanie bulğannan birle berençe tapqır tuğan ilenä 5 köngä kilde. Tarixta ikençe tapqır Rim Papası sinagogağa kerep holokost qorbannarı ruxına doğa qıldı. Şuşı ğämälne başqarğan berençe katoliklar yulbaşçısı – İoann Paul ikençe ide. Benedikt şulay uq protestant çirkäwe wäkilläre belän söyläşülär uzdırdı.

Şimbä könne isä Rim Papası möselman yulbaşçıları belän oçraştı. Şaqtıy qırıs çığışında Benedikt, möselman yulbaşçıları, yäş buınnı keşe ğömeren xörmät itergä öyrätü öçen cawaplı bulırğa tieş, dip belderde:

"Höcümnärne planlaştırğan keşelär zur ixtimal belän bezneñ aralarnı bozırğa, tınıç ğädel häm yaqtı tormışıbızmı böten yullar, şul sanda din yulı belän bozırğa teli. Barıbız da kileşäbez ki, terrornıñ här töre – yäşäw xoquqına höcüm häm sivilizasiäle cämğiätneñ nigezlären qaqşatu bulıp tora."

Papa şulay uq, dönyadağı böten dinnär terrorğa qarşı berläşergä tieş, dide. Benedikt belän oçraşqan möselman yulbaşçılarınıñ berse, Germaniädäge Möselmannarnıñ Üzäk Şurası başlığı Nadeem Elyas, Vatikan belän möselman dönyası arasındağı mönäsäbätlär – qanuni däräcä alırğa tieş, dip belderde. Elyas süzlärençä, xristiannar häm möselmannar, "urtaq tarixtağı qara çornı yabırğa tieş". Vatikan, yähüdlär belän bulğan kebek, möselmannardan ğafu ütenergä, möselmannar isä üzläreneñ "tarixi ğäyeben" tanırğa tieş, dide Elyas.

Germaniädäge 3 million 200 meñgä yaqın möselmannıñ yaqınça ike millionı – töreklär. Şimbä könne Rim Papası belän şulay uq Törek İslam Berlege prezidentı Ridvan Cakir da oçraştı, häm soñıraq ul menä närsälär söyläde:

"İbrahimi dinnär keşe tormışınıñ iñ izge äyber bulğanın, keşelärneñ tınıçlıqta häm duslıqta yäşärgä tieşlegen öyrätä. Bu söyläşüdä bez İzge Papa belän ber törle fikerdä buluıbıznı kürdek, häm bez moña bik şat" dide Cakir.

Kiçen Rimğa qaytqançı Benedikt Germaniädä tağın Rim katolik çirkäwe ruxaniläre belän oçraşırğa tieş ide.

Alsu Qormaş
XS
SM
MD
LG