Qazannıñ zur bäyrämenä äzerlek, meñyıllıq qunaqları, çaraları artında küp kenä başqa möhim häm qızıqlı waqiğalar xäzer iğtibarsız qala. Şular arasında – inde berniçä könnän başlanaçaq yaña uqu yılı. Ğädättä yaña uqu yılına äzerlek respublikada avgustnıñ soñğı könnärenä qädär däwam itsä, bıyıl ul inde tämamlandı disäñ dä bula. Monıñ säbäbe – Qazannıñ meñyıllığı älbättä. Qayber mäğlümätlärgä qarağanda, bäyräm könnärendä ütäçäk çaralarğa Qazanıñ uqıtuçıları da cälep iteläçäk. Mäsälän, tatar tele uqıtuçıları qunaqlar belän eşläwdä qatnaşaçaq. Küräseñ, Qazannıñ bäyrämenä çaqırılğan millättäşlärebez belän tuğan teldä aralaşırğadır inde. Şuña da, mäktäplärne, bigräk tä Qazanda, yaña uqu yılına äzerlek tizlätelde. Respublikanıñ rayonnarında isä bu könnärdä mäğärif xezmätkärläreneñ avgust kiñäşmäläre bara. Şunısın da äytergä kiräk, başqalada mäktäp uquçıları yaña uqu yılın ğädättägeçä 1 sentäberdä başlasa, yuğarı uqu yortlarında belem aluçılarnıñ uqu yılı bıyıl barı tik 5 sentäberdän genä totınaçaq. Bu da Qazandağı bäyräm çaraları belän bäyle.
Tatarstan mäktäplärenä bıyıl berençe märtäbä 37 meñ bala baraçaq. Uzğan yıl belän çağıştırğanda älege san 300gä kimräk. Berençe qaraşqa, ayırma ällä ni küp tügel. Läkin 10 yıl elek bulğan sannar belän çağıştırsañ, Tatarstanda demografik wazğiätneñ ayanıçlığı inde sizelä. 1995 yılda berençe sıynıfqa xäzerge kön belän çağıştırğanda 10 meñgä artığraq bala barğan. İkençe, yäğni 2006-2007 uqu yılında mäktäpkä täwge tapqır baruçılarnıñ sanı 1 meñgä azraq bulaçaq. Şulay itep, balalar baqçaları, mäktäplärdä balalar sanı kimi, dimäk alar yabıla, anda eşläwçelär eşsez qala.
Alay da, balalar azaya dip kenä, respublikada yaña mäğärif oyışmaları tözelmi tormıy. Mäsälän, 2005 yılnıñ axırına qädär Tatarstannıñ törle töbäklärendä 26 yaña mäktäp açılaçaq. Alarda 4 meñnän artıq uquçı belem alaçaq. 200 balanı sıyındırğan 4 balalar baqçası da safqa bastırılır, dip kötelä. Bu sannarnı respublikanıñ Fän häm mäğärif ministrı urınbasarı Danil Mostafin iğlan itte. Ul beldergänçä, respublikanıñ bar mäktäplärendä dä kiräkle tözekländerü eşläre inde tämamlanğan. Şuña da qaramastan, küp kenä uqu yortları yanğın sünderü häm epidemiologik xezmätlär quyğan taläplärgä turı kilmi. Läkin bu säbäple genä 1 sentäberdän mäktäplär açılmıy qalmayaçaq.
Milli mäğärifkä kilsäk, anda yaqın kiläçäktä nindi üzgäreşlär kötelä soñ... Bu xaqta Azatlıq radiosı tıñlawçılarına Tatarstan Fän häm mäğärif ministrlığınıñ milli mäğärifne üsterü bülege citäkçese Radik Zaripov söyli.
Yaña uqu yılında bez tatar tele häm ädäbiäte buyınça yaña däwlät standartların buldırırğa telibez. Şulay uq törle fännärdän bez üzebezneñ töbäkkä bäyle bulğan milli-regional komponent nigezendä eşlängän östämä äsbaplar äzerlibez. Başqa çaralarğa kilgändä, tatar telen öyränüçe yäş ğalimnär öçen grantlar buldıru, tatar tele buyınça studentlar öçen törle bäygelär oyıştıru kebek çaralar da qaralğan
Radik Zaripov süzlärenä qarağanda, tatar tele uqıtuda da kiläçäk uqu yılında üzgäreşlär kötelmi. Anıñ süzläreneñ tormışqa niçek aşuı turında bez sezgä kiläse tapşırularıbızda söylärbez.
Gölnaz İlgizär
