Accessibility links

якшәмбе, 4 декабрь 2016, Казан вакыты 13:13

Färit Möxämmätşin:“ Dürt tatar” teatrı yäşlärneñ häm uyın-kölke söyuçelärneñ aralaşu urını bulır”


Şuşı könnärdä 1000 yıllıq Qazanda, Rusiädä berençe tapqır studentlarnıñ “Dürt tatar” isemle şayannar häm tapqırlar klubı teatrı açıldı. Teatrnı açu tantanasında Tatarstannıñ däwlät şurası räise Färit Möxämmätşin, yäşlär eşläre, sport häm turizm ministrı Marat Bariev, şähär xakimiäte başlığınıñ urınbasarı Älfiä Tutayıwa qatnaştılar.
Färit Möxämmätşin KVN komandası äğzaların yaña binağa küçü belän qotladı häm üzeneñ süzendä:“ Qazannıñ 1000 yıllıq yubiley aldınnan KVN teatrı açıluı ayırım mäğnägä iä. Qazanlılar bäyräm aldınnan üzlärenä büläk yasıy. Başqala yañara binalar tözelä, iskeläre tözekländerelä. Şul uq waqıtta bez yäşlärneñ entuziazmın, şul isäptän KVN xäräkäten onıtmıybız. Respublika KVN tarixına 10 yıl buluğa qaramastan, anı Rossiädä dä belälär”, dip bilgeläp ütte däwlät şurası räise. Anıñ äytüençä, başqala üzägendä teatr yäşlärneñ aralaşu urını bulaçaq. Alar monda üzläreneñ qıyu ideyälären tormışqa aşıraçaq.
Şulay uq Färit Möxämmätşin şayannar häm tapqırlar klubı tarafınnan äytelä torğan süzlärneñ xalıq arasında kiñ taraluın häm “Dürt tatar”nıñ tanılğan frazasın iskä töşerep uzdı. Ul tatarnıñ härwaqıt alğa baruın iskärtüçe ğibärä ide.
Respublikada KVN tarixı 10 yıllap isäplänä. Aña meditsina universitetı studentları nigez salğan. Bügenge köndä inde Tatarstanda räsmi räweştä 870 komanda terkälgän. Yaña teatr açılışına da respublikanıñ törle ligalarında uynawçı komandalar kilgän ide. Şular arasında tatar KVNnıñ cıyılma komandası da çığış yasadı.
Teatrnıñ konsert zalı zamança ut häm tawış apparaturası belän cihazlandırılğan. Şunda uq grimlau häm repetitsiä bülmäläre, tawış yazdıru studiäläre urnaşqan. Biredä KVN komandalarınnan tış, Qazannıñ “Mizgel” biyu teatrı, breyn-ring häm STEM komandaları repetitsiälär ütkäräçäk.
Färit Möxämmätşin süzlärenä kаraganda, KVN xäräkätendä qatnaşuçılar tormışta da yuğalıp qalmıyça, üz urınnarın tapqannar. Başqala üzägendäge älege teatr yäşlärneñ häm uyın-kölke söyuçelärneñ aralaşu urını bulır dip ışandırdı däwlät şurası räise.
Xäzergä “Dürt tatar” komandası rus telendä eşli, ämma Rusiädäge berençe KVN teatrında tatar komandalarına da işeklär açıq dip belderde “Dürt tatar” komandası äğzası Rişat Gıymaltdinov.
“Respublikada nindi komandalar bar härberse monda kilep uynıy ala. Teatr işekläre Härkemgä açıq.”
Gölnaz Şäyxetdinova

XS
SM
MD
LG