Accessibility links

шимбә, 10 декабрь 2016, Казан вакыты 12:02

BMO wäkile Äfğanstandağı wazğiät saylawlarğa qurqınıç tudıra dip kisätä


Berläşkän Millätlärneñ Äfğanstandağı wäkile Jean Arnault soñğı waqıtta bu ildä höcümnärneñ artuı kiläse ayğa bilgelängän parlament saylawların qurqınıç astına quya, dip kisätte. Äfğanstannıñ kürşe illäre häm xalıqara köçlär saylawlar waqıtında tınıçlıq saqlawda yärdäm itergä wäğdä itte.

Berläşkän Millätlärneñ Äfğanstandağı wäkile Jean Arnault sişämbedä İminlek Şurasında çığış yasap parlament saylawlarına 3 atna qala andağı wazğiätkä citdi borçılu belderde. İlneñ könyağında, könyaq-könçığışında häm könçığışında höcümnärneñ artuı andağı paştu xalqınıñ saylawlarda qatnaşa aluın qurqınıç astına quya, dide ul:

"Saylawlarnı özü tırışlıqları bulmas dip äytergä äle irtä. Könçığış çik buylarındağı iminsezlek artuı da borçular uyata."

Berläşkän Millätlär häm Äfğanstannıñ bäysez keşe xoquqları komissiäseneñ kiçä iğlan itelgän xisabında bu cäydä saylaw eşçelärenä, namzätlärgä, mäxllä citäkeçlärenä, xärbi köçlärgä höcümnär artu turında äytelä.

Bu atnada Taliban süzçese ğisyançılar 18 Sintäber saylaw könendä saylaw urınnarına höcüm itmiäçäk, läkin saylawğa äzerlekne özergä tırışaçaq dip belderde.

Jean Arnault süzlärençä, 6300 saylaw urının Äfğanstannıñ 30 meñläp politsiä köçläre saqlayaçaq. Alarğa İspaniä, Niderland, Romaniä häm Quşma Ştatlar xärbiläre yärdäm itäçäk. Arnault şulay uq, saylawlarnı ütkärügä tağın 30 millionlap dollar aqça citmäwen dä äytte.

Paqstannıñ Berläşkän Millätlärdäge ilçese Mönir Äqräm üz ileneñ Äfğanstan belän çiklären nığıtuın äytte, ä Berläşkän Millätlärneñ monı kürmäwenä qänäğätsezlegen belderde:

"Çik buylap 700 post quyıldı, saylawlar aldınnan 4000 xärbi östälde. Äfğanstan belän xalıqara köçlärne quşıp sanasañ da, bezneñ çik buyındağı köçlär zurraq."

Äfğanstanda höcümnär oyıştıruçı ğisyançılarnıñ kübese Paqstannan kilä dip sanala. Uzğan yıl Äfğanstanda prezident saylawları waqıtında Paqstan köçläreneñ tırışlığı belän bu höcümnärneñ sanı kimetelde.

İminlek Şurası utırışında parlament saylawlarınıñ tınıç ütüe zur ähämiätkä iä dielde. Berük waqıtta Äfğanstanğa saylawlardan soñ üseş strategiäsen buldıru, berençe çiratta äfyün sänäğäteneñ tamırın qorıtu kiräklegenä basım yasaldı.

İrannıñ Berläşkän Millätlärdäge wäkile Cawad Zarif kürşe Äfğanstanda äfyün citeşterü artuına borçılu belderde:

"Äfğanstan xökümäte tırışlığı belän äfyün citeşterüçe qayber töbäklärdä citeşterü kimetelde, läkin şul uq waqıtta İran belän çiktäş töbäklärdä, bigräk tä Farah vilayätendä bu citeşterüneñ artuı añlaşılmıy. Bu xäl bezneñ borçuğa sala."

Zarif şulay uq Äfğanstan xäkümäteneñ soñğı ike distä yılda İranğa qaçıp kitkän millionlağan äfğannı kire qaytaru eşeneñ totqarlanuına qänäğätsezlek belderde.

-Ali Gilmi
XS
SM
MD
LG