Accessibility links

шимбә, 10 декабрь 2016, Казан вакыты 02:13

Tömändä tatar telendä ber-ber artlı öç kitap dönya küräçäk


Şuşı könnärdä Tömändä tatar telendä öç kitap basılıp çığaçaq. “Yañarış” gazetası redaksiäse üzeneñ 15 yıllıq bäyräme uñayınnan “Bireşmä, saqla gazetanı” digän cıyıntıq çığara. Cıyıntıqqa “Yañarışnı” oyıştırğan, 2005 nçe yılnıñ yazına qädär anıñ baş möxärrire bulıp eşlägän, waqıtsız arabızdan kitkän, Azat Sägitovnıñ soñğı 5 yıl eçendä yazğan 30 lap mäqäläse tuplanğan. “Baş möxärrir wazifaların başqaruçı Alsu Sägitova süzlärençä, 1 meñ danädäge kitap “Yañarış”nıñ tuğan könenä -15 nçe sentäbergä äzer bulaçaq. Çığımnarnı Tömän ölkäseneñ xokemäte tulısınça üz östenä alğan.

Tömän şähärendä yäşäwçe şiğri canlı Sägit Sägitov “Xalqım xäle” digän şiğerendä bolay dip yazğan ide:

“Tuğan xalqım, sineñ xäleñ niçek?

Nik adaşqan izge yullarıñ?

Sin yäşiseñ telsez, endäşmiçä

Kissälär dä tayğa-urmannı.

Üz cireñdä yalçı bulıp qaldıñ

Ayırmıyça dusnı-doşmannı.

Seberemnän törle xalıq uzğan

Toqım tamırları tarmaqlı.

Berdämlege bulmağanğa kürä,

Tuqtatmağan yawız Yırmaqnı.”

Näq menä şuşı yullar belän Sägit Sägitovnıñ berençe şiğerlär cıyıntığı açıla. Ul 1998 nçı yılda dönya kürgän ide. Annan soñ 2000 nçe yılda Sägit Sägitovnıñ uç töbe qädär genä “Sezgä äytäm...” digän kitapçığı basıldı. Bu ike cıyıntığın da ul üz köçe belän çığardı. Şuşı könnärdä şağirneñ tağın ber cıyıntığı “tabadan töşärgä tora”. Anı çığarunı Tömän ölkäseneñ “Miras” ictimaği-xäyriä fondı üz östenä alğan. Kitapnıñ tözüçe-möxärrire, jurnalist, tatar xatın- qızlar oyışması başlığı Bibinur Sabirova äytüençä, meñ danädä dönya küräçäk bu cıyıntıqqa Sägit Sägitovnıñ moña qädär basılğan şiğerläre dä, yañaları da kergän. Kitap “Qayınnar şawlıy” dip atala.

Audio

-Ni öçen “Qayınnar şawlıy” dip quydım. Ul keçkenädän qayınnar şawlawın tıñlap üskän. Ul keçkenädän balıqqa awğa yörgän. Bik tabiğät'ne yarata. Häm qayın şawlawlarına quşılıp üzeneñ törle uylarına çuma. Qayın eçendä utıra awılı da anıñ.

Sägit Sägitov üzen Seber tatarı dip sanıy. Tömän yanındağı Yambay awılında tuğan. Anıñ fikerençä, mäktäplärdä tatar telen qıssalar da, balalarıbıznı, onıqlarıbıznı tatarça uqırğa, söyläşergä üzebez öyrätergä tieşbez. “Telebez bulsa, ilebez bulsa, millät yäşär”,- di ul.

Öçençe kitap bu könnärdä näşriätqa tapşıru öçen äzerlänä. Bu kitap “Seber xanbikäse Süzge” dip atala. Anı şulay uq Bibinur Sabirova äzerli. “Seber xanbikäse Süzge” ike teldä: tatar häm urıs tellärendä dönya küräçäk. Kitapta “Qanatlı at” (Konek-ğorbunoq) äkiäteneñ avtorı Niqolay Yerşovnıñ Süzge turındağı poeması häm bu poemanıñ tatar telenä tärcemäse urın alaçaq. Bu kitapnı Minzat İbatullin citäkçelegendäge ölkä tatar kitap näşriäte çığaraçaq.

Nail Alan. Tömän.

XS
SM
MD
LG