Accessibility links

дүшәмбе, 5 декабрь 2016, Казан вакыты 23:41

Qazan 1000 yıllığı muzeyı açıldı


25 avgust könne, Qazan milli mädäni üzägendä, 1000 yıllıq muzeyı eşli başladı. Ul milli mädäniät muzeyı nigezendä, 1 yıl eçendä tözelgän. Belgeçlär äytüenä qarağanda, fänni eksponatlarnıñ iñ qädärlese itep, 1000 yıllıqnı raslawçı ğäräp häm çex täñkälärne sanarğa bula.

1000 yıllıq muzeyı açıluğa bağışlanğan tantanada, tarixçılar, arxeologlar, mädäniät xezmätkärläre muzey tözü kebek fänni eşeneñ tämamlanuın bäyräm itte. Muzeynıñ tözügä qatnaşqan akademik Mirqasıym Usmanov, tantanada çığış yasap, fänni eştä qatnaşqan barlıq ğalimnärgä räxmätlären belderde. Qazannıñ tuğan könen, citdi fänni ezlänülär, dönya tarixçıları, arxeologları çığarğan qararlarğa ğına nigezlänep belep buldı dide ul. Qazan zıyalıları, muzey xezmätkärläre, şulay itep, üzlärençä Qazannıñ tuğan könen bilgeläp ütte. Nurlı Qazan cırlarda cırlandı, şiğerlärdä aña yaratu süzläre äytelde. Böten dönya tatar kongressı räise häm milli mädäni üzäk citäkçese Rinat Zinnurov, uz çığışında 1000 yıllı muzeynıñ zur öleşe tatar xalqı, tarixına da bağışlandı dide. Muzeynıñ fänni konsepsiäsen tezüçelärneñ berse, İndusä xanım Minhaceva muzey turında, «Azatlıqqa» maxsus, añlatmalar birde. Anıñ äytüenä qarağanda, elekke muzey äyberlärenä yañalar qaytarılğan, kürgäzmälär bayıtılğan. «Qazan tacı» küçermäse elek tä bulsa, maxsus 1000 yıllıq muzeyı öçen Qazan xanı täxete dä torğızılğan ikän. Tarixi datanı raslawçı täñkälärneñ küçermäläre bıyılğı bäyrämgä atap yasalğan. Şunıñ belän bergä, muzey xäzer waqiğa häm çorlarnı keşe sınnarı, öy, bülmä küreneşläre aşa çağıldırıp birügä yöz tota. Mäsälän, muzeynıñ urta ğasırğa bağışlanğan zalında, Qazan bistäsendäge ber tatar ağayı bülmäse kürsätelgän. Maneken-kurçaqçalrğa 19-20nçe ğasır kiemnäre kidertelep, ul çordağı şähär tatar-xatın qızları, yevropaça kiengän tutaş häm xärbi gäwdäländerelgän. Karl Fuks salonı häm tatar ğalimeneñ bülmäläre şartlı räweştä torğızılğan. 1000 yıllıq muzeynıñ eksponatları arasında töp nösxäläre dä, küçermäläre dä bar. Bu muzeynıñ tarixi, qimmätle äyberläre Qazannıñ milli muzey, Mäskäw, Peterbur, Yaroslavl muzeylarınnan cıyılğan. Muzeyda küp sanlı ekskursiä kürsätüçelär eşli, urıs telendä söyäüçelär belän bergä, ber niçä keşe tatarça da Qazan tarixı belän tanıştıra. Tatar ekskursovodları artınnan, pänceşämbe könne, kübesençä çit il tatarları iärep yörde.



Bikä Timerova.

XS
SM
MD
LG