Accessibility links

дүшәмбе, 5 декабрь 2016, Казан вакыты 07:43

Omskinıñ “Säetqazı” mäçete yaña binağa küçte


Omskinıñ Port-Artur poselığında yaña mäçet bulaçaq. Äytergä kiräk, moñarçı da biredä yäşäwçe moselmannarnıñ ğibädät qılu urınnarı bar ide. Anda şaqtıy tuzğan häm zur bulmağan ber toraq yort “Säetqazı” isemen yörtüçe mäçet itep yaraqlaştırılğan ide. Bilgele ki, binanıñ ifrat tawşalğan buluı möselmannarnı härdaim borçıp tordı. Bıyıl yazın şähär başlığı saylawları aldınnan bulğan oçraşularda alar kandidatlardan yaña mäçet buldıruda yärdäm kürsätülären ütengännär ide. Häm menä yaña mer Viktor Şreyder, bu üteneçne istä totıp, mäçet öçen bina satıp alırğa ölkä byudjetınnan öç million ber yöz meñ rubl' aqça bülep birelügä ireşte. Bu aqçağa küptän tügel genä tözelgän möselman oyışmalarınıñ koordinatsiä şurası älege poselokta kirpeçtän eşlängän 2 qatlı yaña toraq yort satıp aldı. Pänceşämbe könne bu binanı tantanalı räweştä möselmannarğa tapşıru seremoniäse bulıp uzdı. Anda räsmi dairälärdän ölkä häm şähär xakimiätläreneñ dini häm milli eşlär buyınça xezmätkärläre, qayber deputatlar buldılar. Seremoniädä şähärneñ Xäyer-İxsan, Koje-Axmed häm İman mäçeläre imamnarı, möselmannar häm başqa qunaqlar qatnaştı. Başta bina belän tanışıp çığıldı, annan soñ doğa uqıldı häm çığıp söyläwlär buldı. Ölkä qanunnar çığaru cıyılışı deputatı Rawil Bikbavov ölkä häm şähär citäkçeläre, birgän wäğdälären ütäp, binanı möselmannarğa büläk itälär dip belderde.

Bina tapşıru seremoniäsendä çığış yasawçılar küp buldı. Barsı da bu eştä yärdäm kürsätkän citäkçelärgä, deputatlarğa räxmätle buluları turında äyttelär, mäçetneñ möselmannarnı berläşterep toruçı izge urın bulıp toraçağına ömet belderdelär. Älege çarada qatnaşqan tatar milli mädäni möxtariäte räise Xäkim Sadıykov ta möselmannarnı yaña mäçetle buluları belän qotladı. Çarada başqa töbäklärdän kilgän qunaqlar da buldı. Alar da Omskilılarnı mäçet öçen yaña bina birelüe belän qotladılar, härdaim mäçetneñ möselmannar belän tulıp toruın telädelär. Sverdlovski ölkäse Pervoural'ski şähäreneñ Tal'sı poseloğı mäçete möğallime Mansur Sadıkov binanıñ maturlığına soqlanuın turında da äytte.

Şunı da äytergä kiräk, yaña binağa küçkän mäçettä äle tözekländerü eşläre tämamlanıp betmägän. Şul säbäple älege seremoniädä bergäläp namaz uqu bulmadı. Mäçet açu tantanası häm berençe märtäbä comğa namazın uqu biredä 16 sentäber könne bulaçaq.

Saniä Mirxaleewa. Omski

XS
SM
MD
LG