Accessibility links

Кайнар хәбәр

BDB illäre citäkçeläre Qazan belän tanıştı


26 avgustta Qazannıñ meñyıllığına bağışlanğan çaralarnıñ iñ qızğan çağı buldı. Comğa könne Tatarstanğa iñ däräcäle qunaqlar da kilde. BDB illäre citäkçeläre, Rusiä xökümäte wäkilläre, törle töbäklär başlıqları – barısın da Qazanda näq menä comğa könne qarşıladılar. Mäsälän, irtänge 10 da Tacikstan prezidentı Emomali Raxmonov, köndezge 12lärdä Qazaqstan prezidentı Nursoltan Nazarbaev kildelär. Ğomumän, köndezge säğät ikegä qädär BDB illäre citäkçeläre barısı da kilep bette. Xäyer, alar arasında Törekmänstan prezidentı Saparmurat Niazov yuq ide. Anıñ urınına sammitqa Törekmänstannıñ Ministrlar kabinetı räise urınbasarı Ağaniaz Agiev kilde.

Bäysez däwlätlär berlege sammitına kilgän illärneñ citäkçeläre Qazan belän tanışuların Tuğan awılım kompleksınnan başladı. Maxsus alar öçen tözelgän Qazan-1000 digän kottedj kompleksında urnaşqannan soñ, BDB illäre citäkçelären anda aşarğa alıp kittelär. Kiçke säğät 6dan soñ sammitnıñ yabıq utırışı başlandı.

BDB illäre citäkçeläreneñ sammitı tämamlanğannan soñ, anda cıyılğan prezidentlar Qazan kremle belän tanıştı. Zur qunaqlarğa tözekländerelgän Blagovesçenie çirkäwen, küptän tügel açılğan Qol Ğäli mäçeten kürsättelär. Alar öçen mädäni programma da äzerlängän ide. Berniçä yıl tözekländerelgännän soñ açılğan Musa Cälil isemendäge opera häm balet teatrında Tatarstan sänğätkärläre çığış yasadı. Alar arasında Venera Ğänieva, Äxmät Ağadi, Nikolay Putilin häm başqalar bar. Çaqırılğan qunaqlar da üzläreneñ ostalığın kürsätäçäk. Bezneñ uzğan tapşıruda, älege çarada tanılğan millättäşebez Rinat İbrahimov cırlamayaçaq, dip xäbär itkän idek. Läkin bu mäğlümät inde iskergän bulıp çıqtı. Konsertnı translyatsiäläwçe Rusiäneñ Kul’tura kanalı teläge buyınça Rinat İbrahimov konsert programmasına yañadan kertelgän bulıp çıqtı. Şulay itep, Qazan qunaqları qarağan konsertnı Kul’tura kanalınnan bar telägän keşe qarıy aldı.

Comğa kiçen isä Qazannıñ Piramida küñel açu üzägendä qunaqlarnı Vladimir Putin qabul itäçäk. Anda da alarğa Tatarstan sänğätkärläreneñ çığışları täqdim iteläçäk. Monda inde Musa Cälil teatrındağı klassik mädäni programmadan ayırmalı bularaq, zamançaraq konsert kürsätelergä tieş. Azatlıq radiosınıñ Qazan studiäsenä kilep citkän mäğlümätlärgä qarağanda, Vladimir Putinıñ qunaqları aldında Tübän Kamanıñ Näwrüz biü teatrı, Qazan xoreografiä uçilesçası şäkertläre, Marat Fäyruşin, Qazan biü ansamble, Aida Ğärifullina, Qazan yegetläre törkeme häm başqalar çığış yasayaçaq. Älege çarada bilgele cırçı Alsu da üzeneñ cırları belän qunaqlarnı şatlandıraçaq. Zimniy son, A naposledok ya skaju digän cırlar belän berrättän ul Ätkäyem cırın da başqaraçaq, dip kötelä. Qayberäwlär älege cırnı Piramida üzägendäge çarada bulaçaq Başqortstan prezidentı Mortaza Räximovnıñ ayıruça iğtibarın cälep itäçäk, digän fikerdä. Mortaza Räximovnı şulay uq yaqtaşı, Başqortstan qızı Aygöl Sağınbaevanıñ çığışı da bitaraf qaldırmas. Tatarstanda şaqtıy populyar bulğan başqaruçı Ozatu dip atalğan tatar xalıq cırın başqarırğa tieş.

Şulay itep, Qazanğa kilgän zur qunaqlar 26 avgustta eşlekle söyläşülär genä alıp barmadı. Alar meñyıllıq şähär belän tanıştı, mädäni programma qaradı. Prezidentlarnıñ xatınnarı da onıtılmadı. Alar öçen dä maxsus programma äzerlängän ide. Döres, alar säyäsi yäki finans mäs’älälärne xäl itmädelär. Prezidentlarnıñ xatınnarı Qazan Kremlendä buldı, Däwlät muzeyı, şähärneñ meñyıllığına bağışlanğan kürgäzmä belän tanıştı.

Gölnaz İlgizär

XS
SM
MD
LG