Accessibility links

дүшәмбе, 5 декабрь 2016, Казан вакыты 19:36

Başqortstan tatarları Qazannıñ olı yübileyenä yäkşämbe könne kitä


Başqortstan prezidentı Mortaza Räximov, Rusiä Däwlät sowetınıñ çirattağı utırışında qatnaşu öçen, comğa könne Qazanğa kitte. Anda ul, Däwlät sowetı utırışında qatnaşu belän bergä, başqa qunaqlar belän bergäläp, Qazannıñ istälekle urınnarı belän tanışaçaq häm törle tantanalarda bulaçaq. Şul uq waqıtta Başqortstan tatar cämägätçelek oyışmaları da bu könnärdä Qazannıñ 1000 yıllıq yübileyenä säfärgä soñğı äzerleklär alıp baru belän mäşğül. Bötendönya Tatar kongressı Başqarma qomitetı çaqıruı buyınça, Başqortstannan cämğıse 70 keşelek törkem millätneñ ruxi märkäze tantanalarında qatnaşaçaq. Başqortstan tatarlarınıñ iñ kürenekle şäxesläre kergän bu törkem 28 august irtäsendä ike autobusta yulğa çığaçaq. Qazanğa oyışqan töstä baru häm andağı tantanalarda aqtiv qatnaşu mäsälälären tikşerü öçen, säfär aldınnan comğa könne tatar milli oyışmaları wäkilläre soñğı kiñäşmäsen ütkärde. BR Tatar cämägätçelek oyışmaları berlege räise urınbasarı, professor Mäcit Xucin üz çığışında Qazanda aldağı könnärdä, yübiley qısalarında bulaçaq qayber mädäni çaralar, tantanalı oçraşular xaqında mäğlümat birde. Anıñ süzlärençä, Başqortstannan barğan wäkillek 29-30 august könnärendä Qazandağı barlıq möhim tantanalarda qatnaşu mömkinlegen ala. Başqortstannan yübiley tantanalarına baruçılar arasında törle hönär iäläre häm törle yäştäge keşelär bar. Tanılğan şağirlär häm yazuçılar, kürenekle sänğät ostaları, kompozitorlar, rässamnar, zur däräcäle ğälimnär, jurnalistlar häm tatar milli xäräkätendä zur eşçänlek alıp barğan millätpärwärlär Başqortstan tatarların wäkillek itä. Törkemdä zıyalılar qatlamınıñ ayıruça küp buluı küzgä taşlana. Qazanğa säfär aldınnan soñğı kiñäşläşügä cıyıluçılar söyläşü barışında üzläreneñ qayber täqdimnären dä yañğırattı. Professor Mäcit Xucin, Qazannıñ 1000 yıllığına bağışlap, tatar telendä çığuçı «Xalıq ixtıyarı» isemle bäysez gäzitneñ maxsus sanı äzerlänep betüen äytte. Şimbä könne anıñ barlıq tirajı da Ufağa qaytarılaçaq. Şunıñ ber öleşen Başqortstan wäkillege Qazanğa alıp barıp, yübiley qunaqlarına öläşergä niätli. Başqortstan Tatar cämägätçelek oyışmaları tarafınnan tözelgän törkemnän tış ta, Qazanğa Başqortstannan qayber kiñ bilgele şäxeslär ayırım çaqıru belän yübiley tantanalarında qatnaşa. Misal öçen, tanılğan cırçılar İdris Ğäziev belän Aydar Ğälimovlar bu atna başınnan uq inde Qazanğa kitte. Alar andağı bäyräm tantanalarında qunaq qına tügel, ä milli sänğätebezne küp töbäklärdän kilgän xörmätle qunaqlarğa täqdim itüçelär dä. Törle mädäni çaralarda alarnıñ çığışları qaralğan. Şulay itep bötendönya tatarlarınıñ başqalası Qazannıñ 1000 yıllığı Başqortstan tatarları öçen dä zur waqıyğa bularaq qabul itelä. Monı bez älege bäyräm könnärendä Başqortstandağı qayber kürenekle şäxeslär belän aralaşudan da yaxşı toyımladıq. Başqortstandağı kürenekle tatar ğälime Sufiän Powarıysov üze dä yañaraq Qazannan äylänep qaytqan ide. Anda ul Prezident Mintimer Şäymiev tarafınnan üzenä birelgän «Tatarstannıñ atqazanğan fän eşleklese» digän maqtawlı isemneñ bilgelären alu tantanasına çaqırıldı. Qazannıñ olı yübileye uñayınnan fikerläre belän urtaqlaşıp, Sufiän Powarıysov menä nilär söyläde.

(Powarıysov) Sez Ufadan tanılğan tatar ğälime Sufiän Powarıysovnı tıñladığız. Başqortstanda yäşäp icat itüçe tanılğan tatar cırçısı Näzifä Qadıyrowa küñelendä dä Qazannıñ 1000 yıllıq yübileye tirän ğorurlıq xisläre uyata ikän. Qazanda eş qına buluın, andağı icattaş dusları belän oçraşıp toruın xislänep söyli ul.

(Qadıyrowa) Başqortstannıñ xalıq artistqası, tanılğan cırçı Näzifä Qadıyrowa buldı bu. Näzifä xanım bıyıl oqtyäbr ayında Qazanğa zur konsert belän baraçağı xaqında da äytte. Ul tamaşada tanılğan cırçınıñ Qazandağı icattaş dusları da qatnaşaçaq. Qazandağı yübiley tantanalarına Başqortstannıñ tanılğan ädiplär dä çaqırulı. Başqortstannıñ xalıq şağire Marat Kärimov Qazannıñ 1000 yıllıq yübileyen üzeneñ dä olı bäyräme sıyfatında qabul itüen äytä. Qazanda ul berençe tapqır monnan qırıq yılğa yaqın elek bulğan häm şunnan birle bar tatarnıñ başqalasına ğaşıyq bulıp yäşi ul.

(Kärimov) Sez Başqortstannıñ xalıq şağire Marat Kärimovnıñ fikerlären tıñladığız. Marat ağa Qazan belän Ufa duslığın nığıtu, ike tuğandaş respublik ädipläreneñ mömkin qädär yışraq aralaşıp yäşäwen teli, kiräk bulsa bu yünäleştä üz öleşen dä kertergä äzer ul. Elekke ixlas mönäsäbätlärne, çın duslıqnı qaytara alsaq, tatar belän başqort ta, Tatarstan belän Başqortstan da köçleräk bulaçaq, di xalıq şağire. Fänis Fätxi, Ufa.

XS
SM
MD
LG