Accessibility links

җомга, 9 декабрь 2016, Казан вакыты 14:48

Üzäk belän töbäklär arasında wäqälätlär almaşu mäs’äläse Qazanda qaraldı


Däwlät şurası wäkilläre, töbäk citäkçeläre, Qazanğa 25 avgustta uq kilä başladı. Alar Qazannıñ iñ qimmätle qunaqxanäse «Miraj»da tuqtap, annan däwlät maşinalarına utırıp cıyılışlarına kitep tordı. Şura bulası Qazan ratuşası binasına, jurnalistlar, Rusiä häm Tatarstan prezidentları matbuğat üzäkläre tözegän isemleklär belän genä kerä aldı.

Qalğan xäbärçelär, xalıqara matbuğat üzägendä, cıyılışnıñ barışın translätsiädän qaradı.

Rusiä däwlät şurası utırışı, Rusiä Prezidentnıñ çığışınnan başlanıp kitte. Oçraşunıñ teması - töbäk häm üzäk arasında wäkälätlärne almaşu mäsäläre itep bilgelängän ide. Vladimir Putin üz çığışında, Däwlät Şurasınıñ 5 yıllığına näticä yasap, Rusiä töbäkläre citäkçelärneñ cıyınıñ eşen näticäleräk itü turında täqdimnär qabul itelä dide. Ul şulay uq, Rusiä däwläteneñ köçe häm çıdamlığında ışanıç bulğaç, töbäkläreneñ möstäqillelgen häm rolen arttıru mömkinlege tudı, dide. Rusiä töbäkläre başlıqları cıyınıñ 5 yıllığı turında notıq uqılğannan soñ, süzne Tatarstan Prezidentı Mintimer Şäymievqa birdelär. Ul, töbäklärgä birelä torğan wäqälätlär sanı arttıru mäs’äläsen yañadan quydı. Mintimer Şäymiev, Rusiä Prezidentınıñ töbäk başlıqlarınıñ wäqälätlären arttıru turındağı kürsätmäsen iskä aldı. Xäzer eş anı ütäwgä qaytıp qala dide. Bez, yıl axırına qädär, respublika häm federal xakimiät oyışmaları belän, küpme ike däräcädäge xakimiät oyışmaları qısqartılğan, ber uq eşne eşläw oçraqları yuqmı, barın da tikşerep çığarğa tieş, dip belderde Tatarstan Prezidentı. Başqa töbäk citäkçelärennän ayırmalı bularaq, ul rusiä xalıqları yäşäyeş mäsälälären kütärde. Mäktäp däresleklärendä, tarix, urıs tarixı bularaq qına kürsätelä, ä bit başqa xalıqlar da anda üz öleşen kertkän, dide Mintimer Şäymiev. Ul üzeneñ çığışında, tatar islamı turında äytkändä, cäditçelek xäräkäten dä iskä alırğa çaqırdı. Qazannıñ 1000 yıllığı bäyrämenä bağışlap, Rusiä Däwlät Şurası utırışın ütkärü bezneñ öçen däräcä, dide ul.

Rusiä Däwlät Şurası utırışında başqa töbäk citäkçeläre dä çığış yasadı. Mordoviä citäkçese Nikolay Merkuşkin, Rusiä xökümäte ministrları belän ber niçek tä oçraşıp bulmıy, dip Rusiä Prezidentına däğwälären belderde. Başqalar, mäsälän, Xabarvskiy ölkäse başlığı Viktor İşayıv, ala alğan qädär suverenitet birgän zamannarnı üttek inde, wäqälät alular keşelärneñ tormışın naçarlatmasın ide, dide. Şuranıñ utırışında Rusiä eçke eşlär ministrı Raşid Nurğaliev ta çığış yasadı. Ul Rusiä töbäkläre başlıqların, terrorğa qarı köräş alıp baru yünäleşendä, üzläre qatnaşıp, nıqlabraq eş alıp barırğa çaqırdı. Axırdan Rusiä Prezidentı äytelgän täqdimnärgä añlatmalar birep, fikeren belderde. Ul, törle däräcädäge xakimiätlär arasında wäqälätlär almaşu qanunı turında añlatmalar birep kitte. Anıñ äytüençä, wäkälätlärneñ qaysıberläre - töbäklärneñ üzläreneke dip atalaçaq, ä qalğanı - töbäkkä birelgän, dip sanalaçaq, dide Vladimir Putin.

Şunıñ belän Rusiä töbäkläre citäkçeläre qatnaşlığında Däwlät Şurası utırışı tämamlandı, ämma sorawlar qaldı. Belgängäçä, Tatarstan häm federal Üzäk arasında wäqälätlär almaşu turındağı Şartnämä federal qanun räweşendä bulır, dip iğlan itelep kilde. Ämma anda, şulay uq, tel mäs’äläsen xäl itü, Üzäk wäkäläteme, yäki Tatarstannıqı bulırmı, digän mäsälädä ike yaq kileşügä kilmägän ide. Bu sorawğa cawap Rusiä Prezidentınıñ Qazanğa kilgäç xäl iteler dip kötelgän ide, ämma bu xaqta yaña mäğlümat çıqmadı. Tel mäs’äläse niçek xäl itelgän, haman da bilgele tügel.

Bikä Timerova.

XS
SM
MD
LG