Accessibility links

Кайнар хәбәр

Qazanda bäyräm çaraları däwam itte


Qazan dönya cämäğätçelege iğtibar üzägendä qala birä. Ul xalıqara säyäsi üzäk rolen inde ikençe kön başqara. Tatarstan başqalasında BDBğa kerüçe illärneñ 11 prezidentı bulu, alarnıñ elekkege Sovetlar berlege urınında yätim bala bulıp tuğan BDB yazmışın xäl itü şaqtıy zur xalıqara waqiğa, älbättä. Monnan tış, Qazanda comğa könne Rusiäneñ küpçelek töbäk citäkçeläre dä buldı. Alar Rusiä Däwlät Şurasınıñ çirattağı utırışında qatnaştı. Tatarstan başqalası öçen moña qädär kürenmägän mondıy xäl, küp kenä cirle küzätüçelärgä zur tä'sir yasadı, bu ni buldı soñ äle, digän soraw tudırdı. Alar fikerençä, Tatarstan xalıqara tanıluda zur ğına ber adım yasadı. İnde, 26 avgustta BDB illäre citäkçeläreneñ sammitı, Rusiä Däwlät şurası utırışı uzğannan soñ, monda qatnaşuçı illärneñ prezidentları häm wäkilläre, Rusiä gubernatorları kiçke yaqta, Musa Cälil isemendäge opera häm balet teatrında konsert qaradılar. Alar inde menä berniçä yıl däwamında tözekländerelep comğada açılğan teatrnıñ berençe tamaşaçıları buldı. Konsert ber säğätkä totqarlandı. Monıñ säbäben prezidentlarnıñ üzara eşläre küp bulğanlıq belän añlattılar. Älege tantanalı çarada kötelmägän xällär dä buldı. Şularnıñ berse - Rusiä prezidentı Putin üzeneñ töp säyäsi süzlären tatarça äytte. Üz çığışında prezident şulay uq Qazannı yevraziä tsivilizatsiäseneñ iñ borınğı üzäkläreneñ berse, dip äytte. Häm federal üzäk belän töbäklär arasındağı mönäsäbätlärne tözüdä Tatarstannıñ häm şäxsän Mintimer Şäymievnıñ uñay rolen bilgeläp ütte.Tatarstan prezidentı üzeneñ çığışında kilgän barlıq qunaqlarğa Qazannı häm Tatarstan xalqın şulay zurlağan öçen zur räxmätlären belderde.
Qazaqstan prezidentı Nursoltan Nazarbaev isä cıyıluçılarğa aldan qazaх telendä möräcäğät itte.Annarı Qazannıñ meñyıllığına bağışlanğan tantanalı cıyılışqa kilüçelär Tatarstan sänğät ostalarınıñ konsertın qaradı.
İnde äytelgänçä, comğada Tatarstan başqalasında ike zur cıyın uzdı. BDB illäre citäkçeläre sammitı häm Rusiä gubernatorları qatnaşında Däwlät şurası utırışı. Şimbädä isä, tağın ber zur utırış - Rusiä, Belarus' häm Qazaqstan däwlätläre tözegän berdäm iqtisadıy mохit utırışı buldı. Bu berlekkä Ukraina da quşılırğa telägen belderde. Ukrainada demokratik köçlär yärdämendä xakimiätkä kilgän Viktor Yuşçenkonı, moña qädär kübräk Awrupağa tartıla, Rusiädän yöz çöyerä dip söylilär ide. Ä Qazanda Viktor Yuşçenko, Rusiä täqdime belän monnan berniçä yıl elek tözelgän Berdäm iqtisadıy moxitkä quşılırğa telägen belderde.
Tatarstanda soñğı ike köndä barğan xalıqara däräcädäge säyäsi waqiğalarnıñ yañğıraşı äle tiz arada ğına betmäs. Çönki, küp kenä kötelmägän yañalıqlar alıp kilgän bu cıyınnar qaytawazı kiläçäk könnärdä dä xalıqara däräcädä üzeneñ tä'siren kürsäter. İnde, xäzerge köndä ük, küp kenä matbuğat çaraları bu waqiğalar turında yazalar. Rusiä federal' üzäge häm töbäkläre arasındağı wäqälätlärne büleşü turındağı Däwlät Şurası utırışı da Qazanda ütte. Küzätüçelär, bu çarada iñ qaynar çığışnı Mintimer Şäymiev yasadı dilär. Çınlap ta, ul Rusiä prezidentı, premyerı, barlıq diärlek gubernatorlar aldında tatarlarnıñ xoquqları turında süz tottı. Federal' üzäkneñ wäqälätlärne töbäklärgä birü turındağı täqdimnärne, bezgä tağın närsälärder elägep kenä qala dip bäyäläde. Monnan tış, Qazanda Törekmänstan BDBğa assotsiäläşkän formada ğına keräçägen belderde. Küzätüçelär, bu BDB eşendä Törekmänstan bötenläy qatnaşmıy digänne añlata didelär. Ukraina Berdäm iqtisadıy mоxitkä kerde.
Gölnaz İlgizär
XS
SM
MD
LG