Accessibility links

Кайнар хәбәр

Ğiraq parlamentında ilneñ yaña konstitutsiä ölgese uqıldı


Konstitutsiä yazuçı komissiä sönnilärne rizalatu öçen soñğı tözätmälär kertkännän soñ, qayber sönnilärneñ haman da qarşı buluına qaramastan yaña konstitutsiäne imzalap parlamentqa tapşırdı. Bu konstitutsiä ölgesen komitetta küpçelekne täşkil itüçe şığıylar belän kördlär täqdmi itte. Bügenge parlament utırışında yaña konstitutsiä tawışqa quyılmadı. Komitet başlığı Şäyx Humam Xämmüdi parlamentnı konstitutsiä tekstı belän tanıştırğanda barlıq taraflar da berdämlek kiräklege turında kileşte, ämma moña niçek ireşü turında kileşmäde dide. Xömmüdi konstitutsiäne qabul itmäwçelär kiläçäktä anı yaqlar dip ömetlänüen äytte. Sönnilär yağınıñ töp wäkillärennän berse Möxämmät Abed Rabbu, kileşmägän mäs''älälär bezne qänäğätländererlek däräcädä tözätelmäde dip sönnilärneñ anı qabul itmäwen belderde. Konstitutsiäne äzerläwgä öleş kertkän 15 äğzadan torğan sönnilär törkeme urtaq belderüdä, konsensusqa iä bulmaw säbäple bu dokument xoquqıy nigezle tügel dielä. ALar bu dokumentnı ütkärmäs öçen BMOnıñ häm Ğäräp Ligasınıñ tıqşınuın sorıy. Ğiraq prezidentı Cälär Talabani ğiraq xalqın konstitutsiäne yaqlarğa çaqırıp anıñ 15-nçe üktäberdä xalıq referendumına çığarılaçağın belderde. Xakimiätlär inde xökümättän azıq-tölek yardäme aluçı ğailälärgä azıq belän bergä taratu öçen 5 million danä konstitutsiä ölgesen bastırırğa äzerlänä. Soñğı minuttağı tözätmälär arasında Säddam Xösäinneñ Baat partiäse turındağı cömlädän partiä süzen töşerep qaldıru da bar. Anda elekke Baat partiäse äğzaların cawapqa tartıru öçen tözelgän komitetnıñ yazmışın dikäber ayında saylanaçaq parlament xäl itäçäk dielä. Konstitutsiä komissiäseneñ sönni äğzası Sadun Zöbäydi üktäber referendumında sönni saylawçılar bu konstitutsiäne kire qağır dip ömetlänüen äytte. Şimbä kiçendä Ğiraqnıñ koalitsion xökümätendäge 5 yuğarı sönni citäkçese konstitutsiä ölgesendä qarşı çıqrı. Alar dokumentnıñ 13 öleşe belän kileşmäwlären äytä. Alarnıñ belderüendä, ägär dä konstitutsiä ölgese sönni wäkillär belän kileşterelmiçä saylawçılarğa cibärelsä zäğif Ğiraq xökümäte taralırğa mömkin dielä. Naif Aqmal, Praga.
XS
SM
MD
LG