Accessibility links

якшәмбе, 4 декабрь 2016, Казан вакыты 06:56

Yaña boz sarayında “Scorpions” çığış yasıy


Qazannıñ meñ yıllığı aldınnan şähär şaqtıy ğına yaña tözelgän qorılmalarğa bayıdı. Ul, gumanitar-pedagogiä universitetı, metro, ippodrom, KVN teatrı diseñme…

29 avgust, düşämbe könne Qazannıñ Yaña Savin rayonında “Qazan - 1000” dip atalğan boz sarayın açu tantanası uzdı.

Uzğan yılnıñ avgust ayında ğına biredä tözeleş eşläre başlanıp kitkän ide. Töp eşne başqaruçı “Lencom” fin kompaniäse tözeleşneñ nigeze itep Hamburgtağı sport sarayın alğan, ämma cirle üzençäleklärne istä alıp, proyektqa şaqtıy ğına üzençäleklär kertelgän.

Dürt qatlı mädäni-sport kompleksı 5,5 gektar cirne bili. Yaña kompleks boz sarayı dip atalıp yörtelsä dä, monda- xokkey, figuralı şuu, boz tamaşaları, törle sänğät kollektivları çığışları, diskotekalar, yaña yıl bäyrämnäre uzdıru planlaştırıla. Şulay uq, kürgäzmälär häm Qazannıñ yaña original' qorılması belän tanıştıruçı ekskursiälär ütkärü küzdä totıla.

Yaña tözeleştä tamaşaçığa xokkey matçları ütkärgändä 10 meñ utıru urını qaralğan bulsa, konsertlar waqıtında ul 12 meñ urınğa citäçäk. Monnan tış, künegülär uzdıra torğan saraynıñ östämä qorılmasında 500 keşegä urın bireläçäk. Ä biregä üz maşinaları belän kilüçelärgä beryulı 800 avtomaşina quyu urını buldırılğan.

Xalıqara xokkey federatsiäse wäkilläre Boz sarayın tikşergäç, ul xalıqara däräcädäge yarışlarnı qabul itä ala digän yomğaq yasağan. “Aq bars” xokkeyçıları biredä yılına 30-40 uyın ütkäräçäk dip farazlana. Ä xokkeyçılarnıñ berençe uyınnarı älege sarayda dekaber-ğinwar aylarında bulır dip kötelä.

Yaña boz sarayınıñ räsmi açu tantanasınnan soñ, monda Konstantin Orbilyan idäräsendäge Däwlät akademiä kamera orkestrı qantaşlığında Skorpions roq törkeme çığış yasadı. Rusiädä älege törkem berençe tapqır 1988 yılda bulğan. Şunnan soñ alar rusiäne yaratıp ölgerälär häm Sankt-Peterburg şähärendä genä un tapqır bulğannar. Qazanda isä “Scorpions” berençe tapqır çığış yasıy, elegräk Tatarstanğa kilü mömkinleklärenä bulsalar da.

Gölnaz Şäyxetdinova

XS
SM
MD
LG