Accessibility links

якшәмбе, 4 декабрь 2016, Казан вакыты 09:07

Yoldızlar alleyasında Mönirä Bulatova häm Salawat yoldızı açıldı


Qazannıñ Bauman uramında urnaşqan Yoldızlar alleyasında 29 avgust könne yaña isemnär päydä buldı. Elegräk açılğan İlham Şakirov, Älfiä Afzalova, Xäydär Bigiçev yoldızlarına düşämbedä tanılğan opera cırçısı Mönirä Bulatova häm estrada yoldızı Salawatnıñ isemnäre östälde. Yoldızlar alleyasına çaranıñ töp geroyları – Mönirä Bulatova häm Salawat Fätxetdinov kilep citkänçe, xalıq aldında bügenge estradanıñ yäş yoldızçıqları cırlıy tordı, räsmi xakimiät wäkilläre çığış yasadı. Ul arada bez Yoldızlar alleyası ideyasın tormışqa aşırğan Bars-records firmasınıñ wäkile Färit Taişev belän söyläşep aldıq. Ul Azatlıq radiosı tıñlawçılarına üz yoldızların açarğa layıqlı cırçılarnıñ niçek saylanuı turında söyläde.

Alleyada kemneñ yoldızın açunı bilgeläw äçen maxsus komissiä eşli. Anda xakimiät, Bars records kompaniäse wäkilläre kerä. Näq menä alar yılğa ber märtäbä, 29 avgustta isemnären Yoldızlar alleyasında mäñgeläşterergä layıqlı cırçılarnı saylılar

Mönirä Bulatova belän Salawat ta ozaq köttermädelär. Kilep citkäç, alar härqaysı üz yoldızları yanına barıp bastı. Aldan uramnıñ trotuarına uyılıp yazılğan isemle qaplanğan yoldıznı Salawat açtı. Bıyıl 90 yäşen tutırğan Mönirä xanım sabır ğına üz çiratın kötep tordı. Xäyer, çäçkälär häm diplom tapşırğanda berençe itep anı qotladılar.

Qotlawlardan soñ, şaqtıy ölkän yäşendä buluına qaramastan, Mönirä Bulatova bik teläp cırlap ta birde. Cırlağaç, Mönirä xanım xalıqqa üzeneñ räxmät süzlären belderde häm Qazannıñ bäyräme belän dä qotlarğa onıtmadı.

İkençe yoldız iäse – Salawat, oyıştıruçılarğa räxmätlären belderep, bez tırış häm yaxşı tormışqa layıqlı xalıq, dide. Yaña yoldızlar açu tantanasına cıyılğan şaqtıy ğına xalıq bu süzlärne xuplap qul çaptı häm tağı da ruxlanıp Salawatnıñ cırın tıñladı. Şunda uq, cırçığa xalıqara sport masterı iseme birelüe turında da iğlan itelde.

Yoldızlar açunıñ tantanalı öleşe tämamlanğaç, bez cırçı Mönir Yaqupov belän söyläştek. Ul 29 avgustta yoldızlı bulğan lawreatlar turında üs fikerläre belän urtaqlaştı.

Tatar xalqı Yewropa illärennän qalışmıyça, opera sänğäten üzebez ittek. Berençe buın opera artistları arasında yözek qaşı bulıp Mönirä Bulatova ayırılıp tora. Menä bügen, Allağa şöker, yoldızğa yoldız açıla. Räxmät aña, meñ yäşäsen Mönirä xanım. Ä menä Salawatqa yoldız açarğa, minemçä, äle irtäräk

Şulay itep, Bauman uramındağı tantanalı çara tämamlandı, ä Yoldızlar alleyasındağı yaña açılğan yoldızlar östennän xalıq yöri başladı.

Gölnaz İlgizär

XS
SM
MD
LG