Accessibility links

Кайнар хәбәр

Dönyanıñ 1000 tatarı qatnaşqan utırışta däwlätçelek mäsäläse kütärelde


Meñgä yaqın tatar qatnaşlığındağı böten dönya tatarlar cıyılışı kötmägän oçraşudan başlanıp kitte. Tatarstan Prezidentınıñ protokol xezmäte äzerlämiçä, tän saqçıları aldan tikşermiçä, çığışlar äzerlänmiçä Minitmer Şäymiev Qazannıñ 1000 yıllığına bağışlanğan cıyılışqa kilep kerde häm çığış yasap kitte. Mintimer Şäymiev tatarlar arasında populär bulıp çıqtı. Anı cıyılışta qatnaşuçı delegatlar ayaq ürä basıp alqışladı, häm çığışın da alqışlar belän berniçä tapqıp bülderde. Ul monda ütep barışlıy ğına kerüen äytte. Rusiä Prezidentı da tatarça söyläwen iskä aldı. Rusiä prezidentı, Vladimir Putin, Qazanda yasağan çığışında, tatarlar turında bulğan tiskäre fikerlärne yuq itep, xalqıbıznı başqalarğa ürnäk itep quydı, dide. «Qayda ğına yäşämäsägez dä, kimsenmägez, gorur bulığız, Tatarstanıbız bar, Rusiä bar, dönya cämäğätçelegeneñ qarşı uñay, ayaqta nıqlı basıp torıp, eş itärgä kiräk, dide ul.

Mintimer Şäymiev, şunnan soñ, televidenie kanalına turı elemtädä qatnaşırğa kitte, tatar delegatları anı yañadan ayaq ürä basıp alqışlap ozattı. Tatarstan Prezidentı qotlawın citkerergä kilgän Däwlät Şurası räise Färit Möxämmätşin, aldan äzerlägän käğäzne uqımadı, üze isemennän genä çığış yasadı. Ul Tatarstanda törle millät wäkilläreneñ dus-tatu yäşäwe, bezneñ urtaq qazanışıbız dide häm tatar kongressınıñ eşen yuğarı bäyläde. Qazan şähär başlığı Kamil İsxaqov başqalanıñ 1000 yıllıq köne bilgäw tarixi belän tanıştırdı. Tatar kongressı başqama komitetı başlığı Rinat Zakirov, Qazannıñ tatar tormışında uynağan role turında küläme çığış yasadı. Bu cıyılış citdi forum räweşendä tügel, ä tantanalı utırış itep kenä ütkärelsä dä, tatarnı borçıy torğan problemalar da äytep kitelde. Dramaturg häm deputat Tufan Miñnullin Başqortstan tatarları mäs’äläsendä fiker belderde. Ufa tatarlarınıñ yıl sayın Qazanğa säfär çığuın iskä aldı. Rusiä möftiläre şurası räise Rawil Ğäynetdin tel häm din mäs’äläsen kütärde. Xäzerge yäşlär, «Tuğan tel» şiğeren,«İ tuğan tel, i matur tel, papka-mamkamning tele.. »itep uqıy, şuña qaldıqmı, din bulmada, tel dä betä, dide ul. Fäüziä Bäyrämova, ğädättäğeçä, qaynar häm kisken çığış yasadı. Başqalardan ayırmalı bularaq, ul däwlätçelek mäsäläsen kütärde. «Bez küpme genä bäyräm itsäk tä, bez ale çitlektä genä bäyräm itäbez, bu zaldan çıqqaç, bezgä kem ikänebezne iskä töşerergä mömkin. Şuña, dönyalar niçek kenä bulmasın, bez däwlät bäysezlegenä omtılırğa tieş»dide Fäüziä Bäyrämova.

Annan soñ çığış yasağan Tatarstan prezidentınıñ säyäsi kiñäşçese Rafael Xakimov çığış yasadı. Ul Fäwziä Bäyrämovanıñ yalqınlı çığışınnan soñ wäzgiätne beraz yomşartırğa tırıştı. Bez, Rusiädä yäşibez dide, tatarlar tuğan tellären belmilär ikän, ğafu itik alarnı. İñ möhime tatar ruxı saqlansın dide.Ul üz çığışın tatarlar tarixın yaqtırtuğa bordı. Bozıp kürsätelä tarix, dide ul. Utırış, Finländiä tatar cämğiäte Okan Tahir qotlawı belän tantanalı utırış tämamlandı. Säyäsi qararlar qabul itelmäde, möräcäğätlär yasalmadı.



Bikä Timerova.

XS
SM
MD
LG