Accessibility links

Кайнар хәбәр

Şähärlärneñ munitsipal üseşenä bağışlanğan “tügäräk östäl”


28 avgust könne uzğan bu utırışta İjaw, Irınbur, Krasnoyarsk, Yekaterinbur kebek şähärläreneñ merları, Xalıqara bankınıñ Mäskäwdäge wäkile Kristalına Gergieva qatnaştı. “Tügäräk östäl”dä şähärlär häm xakimiätlär üseşe, cirle üzidarä reformasın oyıştıru häm xalıqqa taşlamalar birü kebek mäs''älälär qaraldı. Saratov şähäre belän Qazan arasında Partnerlıq mönäsäbätläre programmasına qul quyıldı.
Qazan şähäre merı Qamıl İsxaqov “tügäräk östäldä qatnaşuçılarnı sälämläp, meñ yıllıq bäyrämgä kilülärenä räxmätlären belderde”. Ul BMO general'' sekretare Kofi Annan häm UNESCOnıñ general'' sekretare Koitiro Matsuurinıñ bäyräm qotlawın citkerde.
Respublika premyer-ministrı urınbasarı, iqtisat häm sänäğät ministrı Boris Pavlov üz çığışında Qazan kebek keçkenä şähärlärgä investitsiälär cälep itü, alarnı iqtisadi cirlektä xäräkät itärgä öyrätü kiräklege xaqında söyläde. Boris Pavlov äytüençä, Qazannıñ mäğärif häm küçemsez milek belän eş itü, kadrlarnı äzerläw, sorı xezmät bazarın beterü ölkälärendä täcribäse bar. Ministrnıñ süzen däwam itep, şähär merı K.İsxakov Qazan şähäreneñ 2015 yılğa qädär üseş strategiäse belän tanıştırdı. Mer şähär üseşeneñ öç töp yunäleşen kürsätte: şähär xalqınıñ sälämätlegen saqlaw häm nığıtu, eşmäkärlek öçen uñaylı şartlar tudıru, urta häm keçe eşmäkärlekkä iğtibarnı arttıru häm şähär moxiten üsterü.
Xalıqara banknıñ Mäskäwdäge wäkile Kristalına Gergieva isä cıyındağı xalıqnı bötenläy şaqqatırdı. Ul üzeneñ bolğar millätennän buluın äytte. Häm Qamıl İsxaqovnı üzeneñ ike tuğan abıysı dip atadı.
“Tügäräk östäl”neñ axırında “Şähärlärneñ munitsipal'' üseşe” digän rezolyutsiä qabul itelde. Utırışta qatnaşuçılar Qazannıñ tuzğan toraqnı sütü, xalıqara banklarnıñ aqçaların cälep itü, xalıqara oyışmalar belän eşläwdäge täcribäsen munitsipal'' üseşeneñ berençe täcribäse bularaq tanıy. Alar Qazannıñ munitsipal'' üseşe buyınça täcribäsen xalıqara oyışmalar aşa taratırğa kileşte. Tuzğan toraqnı beterü programması öçen, Qazan şähärenä BMO-Xabitat uzdırğan “İñ yaxşı praktika” digän bäygedä qatnaşırğa täqdim itärgä qarar qıldı.
Al''bina Zäynulla
XS
SM
MD
LG