Accessibility links

җомга, 9 декабрь 2016, Казан вакыты 20:34

Qazannıñ 1000 yıllığında qatnaşqan semberlelär bu oluğ bäyräm tatar xalqınıñ kiläçägenä zur uñay täesir yasar, dip sanıy


Räsäy digän ilneñ bäyrämnärgä bay buluı ğomum mäğlüm inde. Bixisap bäyrämnär arasında yaxşı – faydalıları da, “törleläre” dä bar. Ä menä Qazannıñ 1000 yıllığına bağışlanğan tantanalarnıñ faydasına şik belderüçe oçramadı. Millättäşlärebez anıñ faydasın närsädä kürälär soñ?

Şuşı sorawğa cawap birüçelär fikerençä, bäyrämnär küp çığımnar taläp itsä dä, anıñ faydası küpkä yuğarıraq. Härkem, diärlek, öç töp uñay tä''sirne telgä ala. Berençese – tatarda milli ğorurlıq uyatu, milli ruxnı kütärü – kiläçägebezgä yaqtı yul aça. İkençe möhim näticä – tatar xalqın, Tatarstannı häm märkäzebez Qazannı böten dönyağa tanıtu. Öçençese - İlbaşı Mintimer Şäymiewneñ “Buldırdıq, buldırabız häm buldırırbız” digän süzlären milli ideyä itep täqdim itüe. Respondentlar fikerençä, milli ideyä alğa baru öçen ömetlär uyata häm mayaq bulıp tora.

Bäyräm tantanaları belän xozurlanğan millättäşlärebezneñ yöräklären tırnağan küreneşlär dä telgä alına. Menä berniçäse.

Ekskursiälär, mäsälän, awır tä''sir qaldıralar. Tatar qızları urıs tarixın bizäp kürsätüçe tekstlarnı ğına citkerälär. Äytik, Qazan universitetı belän tanıştıruda barı tik rus familiäle ğalim uqıtuçılar ğına maqtala. Alkin - Kazıymbäklär dä iskä alınmıy. “Spas manarasın Pskov masterları tözegän” digän süzlär dä qolaqlarnı kisä, dilär qunaqlar.

İppodrom yanında törle millätlär yortları küreneşläre dä tatarnı kimsetä. Äytik, urıs awılında çirkäw quyılğan, näfis tuqıma, çülmäkçelek sexları, timerçelek yasalğan. Bu isä başqa millätlär mondıy käseplärgä iä bulmağan, digän fiker dä tua. Yuğisä, “kuznitsa” digän tatar süze QUZNAdan, “tkaçestvo” digäne tatar süze TUQU – TUQIMAdan yasalğan bit, dide Mäxmüt Xäyrullin.

Älbättä, mondıy kimçeleklär oluğ bäyrämne xurlaw maqsatınnan äytelmi. Tatarnı ğorurlandırğan bäyrämnärdä dä şul uq tatarnı tübänsetü xisabına başqalarnı kütärmäskä ide, dip can ärnüdän genä äytelgän süzlär bu, dip tä östäde “Tuğan tel” oyışması räise.

Ayrat İbrahim, Qazan-Sember

XS
SM
MD
LG