Accessibility links

Кайнар хәбәр

Tatarstan mäktäplärendä yaña uqu yılı başlandı


Tatarstanda şuşı qıñğıraw tawışı 1 sentäber, Belem könendä 450 meñgä yaqın uquçısı öçen yaña uqu yılı başlanuın bilgeläp şaltıradı. Älege balalarnıñ 37 meñe mäktäpkä berençe sıynıfqa kilde. Barlığı bu könne respublikada 2 meñnän artıq mäktäp uquçılarğa üzläreneñ işeklären açtı. Älege uqu yılında 3 meñ yarım balağa xisaplanğan yaña 29 mäktäp tä tözelde. Alarnıñ kübese 1 sentäber könne tantanalı räweştä açıldı da inde. Mäsälän, Bawlı rayonınıñ İsergäp awılında uqıtuçılar Belem könendä üzläreneñ uquçıların yaña mäktäptä qarşı aldılar. Tantanada Tatarstannıñ Fän häm mäğärif ministrı Räis Şäyxleslamov tä qatnaştı. Şul uq könne ministrı respublikanıñ mäğärif tarmağı xezmätkärlären Belem köne belän qotladı. Mäğärifneñ kiläçäge – respublika häm böten ilneñ kiläçäge, anı barlıqqa kiterü uqıtuçı häm uquçınıñ wazifası bulıp sanala, şuña kürä üsep kilüçe yäş buınnı watanpärwär ruxında tärbiäläwgä ayıruça zur iğtibar birergä kiräk, dip äytelä älege qotlawda.

Şunısın dä äytep ütärgä kiräk, 2005-2006 uqu yılında respublikanıñ qayber mäktäplärendä eksperiment räweşendä tatar telen uqıtuda üzgäreşlär dä kötelä. Monda yañalıq şunda, xäzer rus mäktäplärendä balalarğa tatar telen çit tel bularaq uqıtaçaqlar. Yaña ısul telne töpleräk, möxitkä çumıp öyränüne küz aldında tota. Yaña programmada, mäsälän, 5 sıynıfta tatar telen atnağa 8 säğät uqıtaçaqlar.

Xäyer, bu xaqta tulıraq añlatmalarnı bez sezgä äle birerbez. Ä xäzer, yänä bäyräm, Belem könenä äylänep qaytıyq. Bilgele bulğança, 1 sentäber uquçılar öçen bik möhim, tantanalı kön, bigräk tä mäktäpkä berençe märtäbä baruçı balalar öçen. Ä menä yıllar däwamında şaqtıy yaña uqu yılın başlağan uqıtuçılar Belem könendä nindi xislär kiçerä, alarğa da bu bäyräm şulay uq yaqınmı... Bu xaqta bez Qazannıñ Mäskäw rayonındağı törek-tatar litseyı direktorı Rinat Cälälov belän söyläşäbez.

Uqıtuçılar öçen dä Belem bäyräme ul bik zur bäyräm. Här uqu yılı yaña säyäxätne başlıy. Häm här uqıtuçı älege säyäxätneñ bäräkätle, xäyerle buluın teläp qala. 3 ay yal itkännän soñ, uqıtuçılar da mäktäpkä yaña xislär, yaña uylar belän kilä

Rinat äfände belän respublikanıñ Apas urta mäktäbeneñ başlanğıç klasslar uqıtuçısı Güzäl Ğatina da rizalaşa. Güzäl Ğatina Azatlıq radiosı tıñlawçılarına Belem köneneñ üzläreneñ mäktäplärendä niçek ütüe turında da söyläde.

Bezneñ Apas mäktäbendä Belem bäyräme bik küñelle, kütärenke ruxta ütte. Yañğır yawıp toruğa da qaramastan, uqıtuçılarnıñ da, balalarnıñ da küñelläre kütärenke ide. 1 sentäbergä balalar baqçasınnan berençe märtäbä mäktäpkä kilüçe balalar üzläreneñ ostalığın kürsätep, böten bäyrämgä cıyıluçılarnıñ käyeflären kütärep cibärdelär. Kilgän qunaqlar da matur qotlaw süzlären äyttelär

Şulay itep, Tatarstanda da 1 sentäberdän mäktäp uquçıları öçen yaña uqu yılı başlandı. Ä menä respublikanıñ yuğarı uqu yortları uquçıları 2005-2006 uqu yılın ikençe atnadan ğına başlayaçaq.

Gölnaz İlgizär

XS
SM
MD
LG