Accessibility links

сишәмбе, 6 декабрь 2016, Казан вакыты 19:06

Mixail Xodorkovski törmädän Däwlät Dumasına küçärgä cıyına


9 yıl törmä cäzasına xökem itelgän mäğlüm eşquar Mixail Xodorkovski üzeneñ Däwlät Dumasına saylanırğa teläwen iğlan itte. Ul monı dikäbr ayında Mäskäwdä uzaçaq östämä saylawlar qısasında eşlärgä cıyına. Bu turıda Mixail Xodorkovski Rusiä watandaşlarına häm saylawçılarına atap yazğan maxsus xatında belderä. Rusiä qanunnarı, xökem qararın yañadan qaraw taläbe belän soñğı däğwa kürelgänçe Xodorkovskigä andıy saylanu mömkinlegen birä.

Ägär kem dä bulsa, may ayında xökem qararı çığu belän Mixail Xodorkovskineñ qissası tämamlandı dip uylasa, ul yalğışa - Rusiäneñ qayçandır iñ bay keşese sanalğan Xodorkovski, xäzer inde üzennän başqa tağın 15 totqın utırğan zindanda ğömer kiçersä dä, il xakimiaten tınğıda qaldırırğa cıyınmıy. İrektä çaqta ul 90-nçı yıllarnıñ qırğıy xosusilaştıruı simvolına äylängän ide, xäzer inde xalıq mänfäğätlären yaqlağan, Kremldäge Goliaf belän köräşkän qaharman Dawıt süräten almaqçı. Çärşämbedä totqınnan yasağan maxsus belderüendä Xodorkovski Mäskäwdäge ber urınlı Universitet saylaw bülgesennän Däwlät Dumasına saylanırğa teläwen iğlan itte. Bu urın elek annan saylanğan deputat Mixail Zadornovnıñ Vneştorgbankqa eşkä kitüe säbäple buşap qalğan ide. Üzäk saylaw komissiäse anda östämä saylawlarnı dikäbrneñ 4-enä bilgelär dip kötelä. Älege bülgedä şaqtıy ğına student, ğalim-ğölämä häm işle mäskäwlelär yäşäw säbäple anda ğädättä liberal qaraşlarda torğan nämzätlär ciñep çığa. Üz xatında Mixail Xodorkovski üzeneñ Dumağa saylanıp Rusiädäge xäzerge xakimiatneñ inde bernärsägä gä sälätle bulmawın, anıñ könnäre sanawlı ğına qaluın kürsätergä cıyınuın äytä. Keşe xoquqların yaqlaw ölkäsendä tanılğan Lev Ponomarev, Xodorkovski Rusiädäge säyäsi oppozitsiägä bulışuı öçen xökem itelde digän qaraşnı yänä qabatlap, anıñ deputat bulu teläge, bu qıyulığı alqışlanırğa tieş dip isäpli:

Audio, Lev Ponomarev

"Ul şaqtıy xäwefle adım yasıy, anıñ törmädä kileş "min saylawlarda qatnaşaçaqmın" diüe, citmäsä äle monı Kreml oyıştırğan maxsus säyäsi xökemnän soñ eşläw anıñ öçen xäwefle närsä. Ämma ni genä bulmasın ul moña bara, şuña da keşelär anıñ bu ğämälenä xörmät häm añlaw belän qararğa tieş. Qayberäwlär monı da yasalma şapırınu dip kürä, läkin Xodorkovskineñ şuşı citdi qararın alar bäyälärgä yaramıy", di Lev Ponomarev YUKOSnıñ elekke citäkçese beldergän niät - Däwlät Dumasına saylanu turında. Bu mäs''älädä anı Uñ köçlär Berlege citäkçelärennän berse İvan Starikov ta yaqlıy. Anıñ fikerençä, xäzer inde küplär Mixail Xodorkovskigä bay neftçegä dip tügel, ä bötenläy başqaça qarıy:

Audio, İvan Starikov

"Küplär öçen Mixail Xodorkovski xäzer inde salımnarın tülämägän öçen törmägä utırtılğan oligarx tügel, ä fikerläwe öçen ezärleklängän şäxes, wöcdan totqını bulıp tora", di İvan Starikov. Xodorkovskineñ deputat bulıp saylanuın yaqlawçı şäxeslär arasında Starikov, İrina Xakamada, Boris Nadejdin kebek liberallarnı ğına tügel, ä elek tä, xäzer dä alarğa kisken qarşı çıqqan jurnalist Sergey Dorenkonı, yazuçı, natsional-bolşevik Eduard Limonovnı, iqtisadçı Mixail Deläginne dä kürep bula. Alarnıñ barısın da älegä Kremldäge xäzerge xakimiatkä oppozitsiädä toru berläşterä. Saylawlar aldınnan Mixail Xodorkovski üzeneñ säyäsi programmasın bäyän itärgä tieş bulaçaq. Moñardan tış anıñ yulında, älbättä, başqa törle qanuni häm yasalma kirtälär dä çığa ala. Ämma säyäsi küzätüçe Vladimir Pribılovski bu uñaydan, Xodorkovski tösle ük totqında bulğan, ämma şuña da qaramastan berniçä yıl elek Tatarstan Däwlät Şurasına deputat itep saylanğan Sergey Şaşurin misalın iskä töşerä:

Audio, Vladimir Pribılovski

Kärim Kamal
XS
SM
MD
LG