Accessibility links

шимбә, 3 декабрь 2016, Казан вакыты 05:37

New Orleans şähärendä üzläre turında berniçä kön xäbär itmägän ike Qazan qızı isän-saw


AQŞnıñ könyağındağı bu şähärdä iñ zur sport sarayında tağın 20 meñgä yaqın keşe qala. Alarnı bügen su basqan şähärdän alıp çığıp avtobuslarda Houston şähärenä cibärä başlarğa tieşlär ide. Ämma xalıqnı çığara başlağan boralaqlarğa ut açılğan dip xäbär itelä, qotqaru eşläre kiçekterelgän. Tatar-inform mäğlümat agentlığı xäbär itüençä, berniçä kön xäbärsez torğan Qazannan ike qız, Qazan Däwlät Universitetınıñ filologiä fakultetı talibäläre Yuliä Sälixova häm Älfiä Nasırova tabılğan, alar isän-saw, ämma älegä qaza urınınnan çığa almıy. Bu xaqta agentlıqqa Houstondağı Rusiä konsullığı diplomatı xäbär itkän. İkese dä cäyne New Orleans şähärendä eşläp häm tel öyränep uzdırğan, äti-änilärenä soñğı tapqır 5 kön elek ber yortnıñ tübäsennän şaltratqan bulğan häm köçle dawıl kilüen xäbär itkän. Yuliä Salixova ğailäseneñ dustı Larisa Frolova radiobızğa menä närsälär söyläp birde:

"Qızlar tağın Rusiädän kilgän 15 talibä belän ber yortta biklänep utırğanın beläbez. Alarnıñ anda küpmeder waqıtqa aşamlıqlar, su häm daruları citärlek bulırğa tieş . Ämma alar şähärdän kitä almadı, çönki anda üz maşinaları bulğan keşelär genä kitä alğan. Studentlarnıñ maşinaları älbättä yuq inde, cirle xakimiätlär yärdäm itmägän. Rusiä eçke eşlär ministrlığınıñ böten rusiä studentları isän-saw qotqarıldı, digän xäbäre bik borçıy, çönki çınbarlıq başqa törle. Qazannan tağın ber qız, Çallıdan ber qız häm Mäskäwdän bez belgän qıznıñ xäbäre yuq"....

AQŞ prezidentı George Bush, federal xökümät Katrina dawılınnan soñ ilneñ tarixında iñ zur qotqaru häm yärdäm çaraların cäyelderde, dip iğlan itte.

ABC televideniäsendä bulğan çığışında, Bush, forsattan faydalanıp keşelärne talawçılar yä benzin bäyälären arttıruçılarğa qarşı çaralar küreläçäk, dide.

Alsu Qormaş

XS
SM
MD
LG