Accessibility links

җомга, 2 декабрь 2016, Казан вакыты 23:00

Qazan Sabantuy batırların cıya


Sabantuylar çorı inde küptännän ütsä dä, älege milli bäyrämneñ ber ayırılğısız atributı bulğan tatar köräşe buyınça bäygelär respublikada yıl däwamında ütep tora. Menä şuşı aralarda da Qazanda tatarça köräş buyınça xalıqara bäyge ütärgä tora. 9-11 sentäber könnärendä Tatarstan başqalasında iñ köçle köräşçelär, törle töbäklärdän kilgän Sabantuy batırları cıyılaçaq. Alar Qazanda ütäçäk tatarça köräş buyınça xalıqara bäygedä qatnaşırğa kilä. Bäygene oyıştıruçılar fikerençä, bu milli sport tören bezdä bik yaratsalar da, soñğı arada aña ähämiät bik birelmi başladı. Tatar köräşenä iğtibarnı yünältep, xalıqnıñ qızıqsınuın arttıru – Qazanda uzaçaq bäygeneñ töp maqsatı. Çaranı näq menä xäzer oyıştırunıñ säbäbe - oktäber ayınıñ berençe könnärendä Qazanda alış yäki bilbawlar köräşe buyınça xalıqara dönya çempionatı ütärgä tieş. Tatar köräşe buyınça bäyge şuña äzerlek bulıp ta torır, digän fikerdä belgeçlär.

Bu xalıqara bäyge xaqında tağı da tulıraq mäğlümät alır öçen bez jurnalist, tatarça köräş buyınça Qazan şähäre federatsiäseneñ räis urınbasarı İldus Ildarxanovqa möräcäğät ittek.

Bez yaña oyıştırılğan tatarça köräş buyınça Böten Rusiä federatsiäse wäkilläre aşa bu bäygegä çaqırular cibärdek. Çaqırunı şulay uq çit ildäge millättäşlärebez dä qaldı. Ğomumän, qayda sabantuylar ütä häm bu milli bäyrämneñ batırları bar, alar barısı da Qazanda uzaçaq köräşçelär cıyınında qatnaşa ala. 9 sentäberdä bez alarnıñ barısın da başqalada kötep qalabız. Qatnaşuçılar öçen maxsus mädäni programma, Qazan belän tanışu da qaralğan. Büläklär dä muldan bulaçaq. Mäsälän, baş batırğa ğädättägeçä täkä häm mikroavtobus bireläçäk. Ayırım awırlıqlarda ciñüçelär isä 2000, 1000 häm 500 dollar külämendä aqçalata büläk alaçaq

İldus äfände bar tatar köräşen yaratuçılarnı 10 sentäberdä köndezge säğät 11dä Üzäk stadionğa çaqırdı. Bäygegä kerü buşlay. Köräştän tış tamaşaçılarğa mädäni programma da täqdim iteläçäk. Qısqası, 10 sentäberdä qazanlılarnı çın tatar köräşe bäyräme kötäçäk.

Gölnaz İlgizär

XS
SM
MD
LG