Accessibility links

шимбә, 10 декабрь 2016, Казан вакыты 04:16

Beslan anaları Rusiä prezidentı belän oçraştı, alar Beslan xaqında çın xaqiqätne açıqlawğa ışanmıy


Beslan faciğäseneñ beryıllığın bilgelägän Rusiädä çomğa könne "Beslan anaları" digän ictimaği törkem wäkilläre Mäskäw Kremlendä prezident Vladimir Putin belän oçraştı. Beslan anaları anda Rusiä citäkçesenä şaqtıy qırıs sorawlar birergä cıyınğan ide. Ber yıl elek bulğan şuşı faciğädä isän qaluçılar federal'' xakimiatne buldıqsızlıqta häm xaqiqätne yäşerüdä ğäyepli.

Beslan faciğäsendä balaları hälak bulğan analarnıñ şuşı komitetı prezident Putin belän oçraşunı äle ber yıl elek, şul waqiğälärdän soñ uq taläp itkän ide. Bu moradına alar ber yıl ütü belän ireşte - ämma xäzer inde alar Putingä bötenläy başqa käyef belän, şaqtıy açulı xäldä kilde. Beslan anaları berençedän, Kreml''gä alarnı qabul itü öçen ni öçen şul xätle ozaq uylanu kiräk buluın añlamıy, ikençedän, üzläreneñ äle haman da xakimiat aldında kütärgän sorawlarğa cawap ala almawına zarlana. Beslan mäktäben yawlap aluğa inde ber yıl ütsä dä, federal'' üzäk älegä waqiğälärneñ çınbarlıqta niçek buluın açıp sala almadı. Beslan analarınıñ Putinnän cawap alırğa telägän sorawları arasında şundıyları da bar - niçek inde 30-dan artıq dip belderelgän, awır qorallanğan höcümçe tärtip saqlaw häm iminlek köçläre belän tulğan töbäktä berkemgä kürenmi genä Beslan mäktäbenä qädär kilep citä alğan? Öç kön däwam itkän krizis waqıtında Putin üze häm anıñ yuğarı iminlek türäläre qayda bulğan? Nigä alar baştan uq totıq aluçı höcümçelär belän söyläşüdän baş tartqan? 1100 keşe totıq itep alınğan mäktäp binasına höcüm yasağanda ni öçen federallar tanklar, utçäçär qorallar, boralaqlar qullanğan? Beslan anaları komitetına nigez saluçılarnıñ berse, faciğädä 13 yäşlek ulı Zaurnı yuğaltqan Susanna Dudıyeva, sigez keşelek wäkillek belän Putinne kürü öçen Mäskäwgä kitär aldınnan xäbärçebezgä bolay digän ide:

Audio, Susanna Durdıyeva

"Bez prezidentnıñ da mäxkämädä, üzeneñ Beslandağı waqiğälärgä tä''sir yasarlıq nindi ğämällär qıluı xaqında tanıqlıq itüen telär idek. Qorbannar buldırmas öçen, näticälärneñ şundıy bäğersez häm qanlı bulmawı öçen ul nilär eşlägän? Bar citäkçelärneñ, bar räsmilärneñ şul waqıtta nilär eşläwen tikşergän maxsus parlament komissiäse bar bit", di Beslan anaları komitetınnan Susanna Dudıyeva. Vladimir Putin belän oçraşu aldınnan şul komitet äğzaları mäğlümat çaralarına açıq xat belän çığıp, üzläreneñ inde ğadel häm açıq tikşerenügä ışanmawın äytä. Häm alar, ägär dä bu wäzğiat tiz arada tamırdan üzgärmäsä, üzläreneñ çitkä kitärgä cıyınuın belderä. Dudıyeva monı bolay añlata:

Audio, Susanna Dudıyeva

"Xäzer inde kürep torabız ki, berni dä üzgärmi, tikşerenü riasız bulsın öçen berni dä eşlänmi. Näq menä şul bezne protestnıñ şundıy räweşenä möräcäğät itügä etärde. Bezneñ xatta şul äytelä, ul bar qorbannar isemennän yazılğan häm Beslan anaları komitetı äğzaları tarafınnan imzalanğan", di Dudıyeva. Bu xat Putingä ultimatum bulıp tora, di Susanna Dudıyeva. Ul, "ägär dä riasız tikşerenü ütkärelmi ikän, ägär dä xakimiat Beslan xälläre turında xaqiqätne bar dönyağa açıqtan-açıq äytmi ikän, bez ildän kitärgä mäcbür bulaçaqbız", di. "Häm xaqiqät öçen köräşne bez söygän watanıbız - Tönyaq Osetiädän çittän torıp däwam itäçäkbez", dip belderä Susanna Dudıyeva.

Audio, Susanna Dudıyeva

Şul xaqiqät öçen köräşbezne bez balalarıbız xaqına närsä genä bulmasın teläsä nindi şartlarda alıp baraçaqbız, di Beslan anaları komitetı äğzası Susanna Dudıyeva.

Kärim Kamal
XS
SM
MD
LG