Qazan xakimiäte Qazandağı qayber uramnarnıñ isemnären alıştırırğa niätli. Qazanda Hadi Atlasi isemendäge uram barlıqqa kiläçäk. Ul älegä qädär Kirpiçno-zavodskaya dip yörtelgän uram isemen alıştıraçaq. Qazan üzägendäge Yaña Kremel' uramına, qayçandır, Qazan xanlığı çorında görlägän Taşayaq yärminkäse iseme birelä. Aviatözeleş rayonındağı Armavirskaya 2 uramı Musa Bigi isemen yörter dip kötelä. Monnan tış, Qazandağı qayber uram isemnäre Bişbalta, danlıqlı fabrikant Alafuzov, säyäsi eşlekle, wäisilär xäräkäte liderı Sardar Wäisov isemnären yörtäçäk. Şulay uq, rusiä möftiyätläre tarixında berençe saylanıp quyılğan möfti, Qazanda Möxämmädiä mädräsäse başlığı bulıp torğan din ğalime Ğalimcan Barudi iseme beän dä ber uram atalaçaq.
Tatarstan başqalasında soñğı waqıtta berniçä uram gına tatar böyekläreneñ isemnäre birelgän ide inde. Läkin, alar dokumentlarda uram bulıp torsalar da, çınbarlıqta tıqrıq kebek uramnar. Mäsälän, Näği İsänbät iseme birelgän uram şundıy tıqrıq qına. Älege yazuçınıñ tuğannarı, şähär xakimiätenä, böyek yazuçınıñ isemen mısqıl itü bu dip möräcäğät itkännär ide. Yäki, Röstäm Yäxin isemen yörtkän uramda ike yort bar. Monnan tış, elegräk, Qazan uramnarına dürt tatarça isem birelde dip xäbär itelde. Bu uramnar da, çittäge bilämälärdä, yäğni poseleklarda bulıp çıqtı. Qazan tatarstan başqalası ğına tügel, ä tatarnıñ märkäze bulıp torsa da, monda küpçelek uramnar urıs isemnären yörtä. Tağın ber uram yazmışı, Bauman uramı iseme açıq qala. Qazan xakimiäte bu uram atamasın da alıştırırğa niäte barlığın beldersä dä, küptän tügel genä Tatarstan prezidentı, Bauman bulıp qalsın, kiläçäk buınnar üzläre qarar annarı dip fikeren äytte. Älege uramnıñ isemen tatar cämäğätçelge Xannar uramı, yäki Söyembikä uramı dip üzgärtergä täqdim itkän ide. Meñ yıllığın yaña ğına bilgeläp ütkän Qazanda tatarlaşu şulay bik äkren bara
Räfis Cämdixan
