Accessibility links

якшәмбе, 4 декабрь 2016, Казан вакыты 09:12

«Tatnet yoldızları-2005» bäygesendä ciñüçelärne bilgeläw waqıtı citä


«Tatnet yoldızları -2005» bäygesenä ğarizalar qabul itü tämamlandı. Bäyge 1nçe aprel könne başlanğan ide. Tatar häm tatarlar turındağı saytlar yarışında qatnaşırğa teläweçlärgä, 4 ay waqıt birelgän ide. İnde bu waqıt bette häm bıyılğı bäygedä 75 säxifäneñ terkälep yarışqa kerüen kürep buldı. Bäyge belgänegezçä ber niçä törgä bülenen ütkärelä, tatar telendäge säxifälär «tuğan tel» häm «iñ yaxşı mäğlümat çarası» digän törlärdä yarıştı. Urıs telendäge saytlarnı jyuri, «Qazannıñ 1000 yıllığı», «tatar dönyası», «Tatarstan respublikası», «Tatarstannıñ mäğlümat çarası» häm «Xobbi» digän törlärgä bülep qarayaçaq. Jyuri äle eşen başlap cibärmäde, bäygeneñ nigezlämäsendä äytelgänçä, 15 sentäbergä qädär, ciñügä layıqlı saytlarnı saylap alu bula, annan soñ, ciñüçelärne bilgeläw oyıştırılırğa tieş. «Azatlıq» radiosı xäbärçese, Qazannıñ 1000 yıllığı çaraları barğan könnärdä, Aynur Sibğatullin belän oçraştı. Belgänegezçä, ul «Tatnet yoldızları 2005» bäygeseneñ töp oyıştıruçısı. Aynur Sibgatullin, bıyılğı bäygeneñ üzençälekläre häm yaña saytlar turında «Tatnet» programması belän äñgämäläşergä wäğdä itkän ide. Ä älegä şunı äytep bula. Tatnet nigezdä şul uq saytlardan tora. Ämma ber niçä yaña sayt da barlıqqa kilgän. «Tataradiosı»nıñ internet säxifäse, Xaci-Tarxan Ästerxan tatarları saytı, «tatarica», «tatarlar.ru» kebek internet säxifälär kiçä genä barlıqqa kilmäde häm tatnetnıñ veterannarı rätenä kerä ala. Ämma bıyılğı bäygedä, yaña, kötelmägän saytlar da bar. Mäsälän, darı şirkäteneñ internet säxifäse, UNİCS – basketbol komandası, «Tatarstanda balıq totu» kebek saytlar, tatar tele häm tarixı turındağı internet bitlärennän ayırılıp tora. Yaña saytlar arasında, Tatarstan rayonnarında yäşäwçe tatar yäşläreneñ gel tatar telendä genä sayt yasawları kebek küreneşne bilgeläp ütärgä bula. Mäsälän, Norma urta mäktäbe, «Abağa» digän olimpiada, Çikläwek, Tatarça soft häm tağın berniçä şundıy çın tatar saytların atap bula. Alarnı yasağan keşelärneñ aralaşu tele tatar häm säxifälärendä alar tatarça yazışa. Ğomum alğanda, Tatnetta wäzğiät üzgärmägän, «Tatnet» digän töşençäne üz eçenä alğan tatar saylarınıñ sanı haman da az bulıp qala. «Tatnet yoldızları-2005» internet bäygeseneñ räsmi säxifäse tatnet.tatar.info adresında tabıp bula. Şunda uq, qatnaşuçılar digän bülektä, yarışqa çığarılğan barlıq 75 saytnıñ adresın kürersez. Ä bäygeneñ näticäse, ciñüçelär isemnäre belän «Azatlıq» radiosında, «Tatnet» tapşıruında daimi tanıştırıp barırbız.

Bikä Timerova.

XS
SM
MD
LG