Accessibility links

якшәмбе, 4 декабрь 2016, Казан вакыты 05:10

Katrina ğarasatına duçar bulğan New Orleanstan keşelärne evakuatsiäläw tämamlandı diärlek


Berniçä täwlek däwam itkän xaostan soñ xärbilär häm qotqaru xezmätläre Meksika qultığı buyında su astında qalğan New Orleansta wäzğiätne nihayät kontrol''gä aluları belderä. Biredä berniçä köngä qanunsız, utsız, susız, azıq-töleksez, yulsız şähärdä qalğan distälärçä meñ keşene evakuatsiä eşeneñ tämamlandı diärlek. Superdome dip atalğan zur futbol qırı häm şähärneñ cıyılu üzägenä tuplanğan keşelärne evakuatsiäläw öçen kiñkülämle ozaq däwam itkän operatsiä ütkärelde. 29-nçı Avgustta Katrina ğarasatı ütep şähärne su basqannan soñ bu urınnarğa 40 meñläp keşr cıyılğan ide. Şimbä könne eçke iminlek sekretare Michael Chertoff federal'' xezmätlär wäzğiätne kontrol''gä aldı dip belderde. AUDİO: Yöz meñnän artıq keşegä humanitar yardäm kürsätelde. Aşığıç yardäm xezmätläre bertuqtawsız eşli. Hawa operatsiäsen başqaruçılar hawa yulı aşa New Orleanstan 4 meñnän artıq keşene alıp çıqtı. Bu operatsiädä keşelärne alıp çığu öçen xärbi hawa transportı ğına tügel, bezgä birelgän, yäki käsepçelek hawa şirkätläre tarafınnan birep torılğan başqa hawa transportı da qatnaştı.

Soñğı berniçä köndä şähärdä qanunsızlıq xökem sörüe, şul isäptän talawlar, köçläwlär häm üterülär buluı turında xäbär itelde. Şähär üzägenä cıyılğan keşelär oyışqan cinayätçel törkemnärgä, xakimiätlär tarafınnan yaqlawnıñ az buluına, yä bötenläw bulmawına, azıq-tölek, su belän tä''min itelmäwgä zarlandı. Waşington bu krizisnı çişü öçen aqrın eş ütä dip tänqitlände. New Orleansta qalğannarnıñ kübese şähärdän kitä almağan, yarlıq qara-tänlelär, afro-amerikannar ide. Waşington bigräk tä afto-amerikan cämğiätläre citäkçeläre tarafınnan tänqitlände. Comğa könne zıyan kürgän töbäkne kilep qarağannan soñ AQŞ prezidentı George Bush bu tänqitlärne tanıp xökümätneñ qotqaru eşe näticäläre qabul itelerlek tügel dide. Bush düşämbe könne töbäkkä yañadan ber märtäbä kiläçäk. Ul zıyan kürgän töbäkkä yardäm itü öçen 10 milliard yarım dollarlıq yardäm paketın imzaladı. Bügen AQŞ däwlät sekretare Condoleezza Rice belän saqlanu ministrı Donald Rumsfeld ta bu töbäkkä kilde. Alarğa keşelärneñ xälenä bitaraflıq turındağı qıyın sorawlarğa cawap birergä turı kilä. Federal'' räsmilär Katrina ğarasatınıñ şul qädär zur zıyan kiteräçägen aldan belep bulmıy ide dip aqlanırğa tırışsa, cirle xakimiätlär häm başqa tänqiläwçelär Bushnı yalın özep tiz genä eşkä kereşmäw, aşığıç räweştä xärbilärne häm qotqaru xezmätlären cibärmäw öçen täqnitli. Katrina ğarasatı waqıtında häm annan soñ su basudan niçä keşe ülgänlege äle dä mäğlüm tügel. Moñarçı qotqaruçılar kübesençä yort tübälärenä çıqqan keşelärne genä qotqaru belän şöğellände. Xakimiätlär meñnärçä keşe ülgän bulırğa mömkin dip isäpli.

Naif Aqmal, Praga.
XS
SM
MD
LG