Accessibility links

якшәмбе, 4 декабрь 2016, Казан вакыты 11:19

İşan Xäbibulla xäzrät Xansöyärev tuuına 200 yıl tulu uñayınnan tantana ütte


İske Qulatqı rayonınıñ Yaña Zimnitsa awılında ütkän bu tantanada 3000 çaması keşe qatnaştı. Çaranı Ğilmi konferensiä dip atağannar ide. Mäğnäse dä bar kebek: kürenekle şäxesneñ tormış yulı üze ük fän iğtibarına layıqtır. İske Kulatkıda tuıp üskän, bügen Samara qalasınıñ “Nur” mädräsäse citäkçese wazifaların başqaruçı İrşat Safin İşan xäzrätneñ tormış yulı turında kitap çığarğan ikän. Şul basma turındağı çığışlar da ğilmi töskä tartım ide.

Bu tantanada kürşe Sarıtaw, Penza ölkälärennän, şulay uq Çuaşstannan xalıq küpläp kilgän ide.

Başta Xäbibulla xäzrät qäbere yanında zirat qıldılar. Soñnan stadionda zur cıyın uzdı. Berençe bulıp rayon xakimiäte başlığı Möxärräm Salixov çığış yasadı. Ul İşan Xäbibulla Xansöyarevneñ tormış yulı belän tanıştırdı. Musa awılı, Çistay, Orenburg mädräsälärendä belem tuplağan din ähele tirä-yaqta dini genä tügel, dönyawi beleme belän dä dan totqan, tabip bularaq ta xalıq arasında zur abruy qazanğan. Riwayätlärgä qarağanda, ul berkemne dä kire borıp cibärmägän, qulınnan kilgän yärdämen qızğanmağan. Näq şunlıqtandır inde, anı din ähele sıyfatında ğına tügel, izge keşe dip tä iskä alalar. Häm anıñ ziratı daimi räweştä pöxtälektä saqlana. Äle änä qäber taşın da yañartqannar. Tik mondıy ğämälne qabul itmäwçelär dä bar. Dinebez taläpläre buyınça, märxümnärne taşlar belän tügel – anıñ izge ğämälläre turındağı xatirälär belän, anıñ ruxına doğalar uqu belän zurlarğa kiräk. Anıñ ruxın olılaw – Xaq Täğälä aldında iñ zur büläk, dide, mäsälän, mädräsä möğallimäse Venera xanım Vaxitova.

Annan soñ qäbergä tabınuda mäcüsilek çatqıları da çağıla, dip östäde möğallimä. Läkin xalıqnıñ ğöref-ğadätenä İşan xäzrät istälege aldında baş iyu ğädätkä kergän ikän, moña qarşı süz äytü qıyın. Bu xalıqnı räncetü bulır ide. Ni äytsäñ dä, izge niät belän başqarılğan eşneñ berkemgä dä zararı yuq bit. Ä İslam dine tazalıqqa zarar kiterüçe, äxlaqnı qaqşatuçı ğämällärne genä tıya.

Oluğ cıyınnan soñ barça qunaqlar da qorban aşı belän sıylandılar. 10нан artıq sarıq, ber tana çalında qorbanğa. Soñğısın İske Kulatkı rayonı İske Atlaş awılınnan çıqqan, bügenge Sarıtawnıñ kürenekle maltabarı Eduard Ganiev alıp kilgän. Ğomumän, bu şäxes tuğan rayonında zur yärdäme belän küptän tanılğan inde. Bu yulı da, İrşat Safinnan Xäbibulla xäzrät Xansöyarevneñ tormış yulı turındağı kitapnıñ baytaq öleşen satıp alıp, cıyılğan xalıqqa tarattı. Tik barısına da citmäde, çönki kitapnıñ nibarı tirajı da 1000 genä danä ikän.

Ğomumän, çarada qatnaşuçılar bik qänäğät taralıştılar. İmanıbıznı yañarttıq, diyuçelär dä oçradı.

Ayrat İbrahim, Sember

XS
SM
MD
LG