Şuşı könnärd, Qazan şähär xakimiäte başlığı Kamil İsxaqov, jurnalistlar belän oçraşıp, başqanıñ 1000 yıllıqtan soñ yäşäyeşe turında sorawlarğa cawap birde.
1000 yıllıq çaraları ütep kitte, Qazan köndälek mäşäqätlärgä çumdı. Matbuğat oçraşuınıñ teması, 1000 yıllıq näticäläre dip iğlan itelsä dä, Kamil İsxaqov, jurnalistlarğa bolarnı yañadan söyläp çığunıñ kiräge yuq, dip nindi dä bulsa yomğaq yasawdan baş tarttı. Barı tik, bäyräm çaraların ütkärgändä, binalarnıñ äzer bulmawı, tözeleşlärneñ betmäwe belän, ber nindi qıyınlıqlar sizmädek, dide ul. Kamil İsxaqovqa metro turındağı sorawlarğa küp cawap birergä turı kilde. Anıñ äytüençä, metroga, 30nçe avgust könne 50 meñläp keşe utırıp qarağan, ä eş könnärendä bu san 13 meñgä töşkän. Şuña kürä, kiläçäktä, metro çığımnarın aqlarmı yuqmı, ul äle äytä almıy. İminlek yağınnan da qazanlılarğa qurqası yuq, çönki Rusiä Prezidentınıñ saqlaw xezmäte, metronı maxsus komissiä tikşermiçä, anda Vladimir Putinnı utırtıp yörtü turında söyläşergä dä telämädelär, dip xäbär itte Qazan şähär xakimiäte başlığı. Belgänegezçä, Rusiä Prezidentı Qazan metrosında ber niçä tuqtalış ütte. Qazan jurnalistların metronıñ kiläçäk tözeleşe dä qızıqsındırdı. Metro tözeleşe öçen ayırım açqa bülenä, alarnı başqa maqsattı faydalnu mömkin tügel, tözeleş däwam iteläçäk, dip wäğdä itte Kamil İsxaqov.Matbuğat oçraşuında, munisipal saylawlar teması da iğtibarsız qalmadı. 16 oktäberdä, cirle üz idärä oyışmaların saylaw bulırğa tieş. Qazan kebek iñ ere munisipal berämlektäge tawış birülär iñ kierenke bulır dip kötelä. 1000 yıllıq çaraları aldınnan, Kamil İsxaqov saylawlarda qatnaşu yäki qatnaşmawı turında, äle uylağanım yuq dip cawap birep kilä ide. Xäzer, jurnalistlar aldında çığış yasağanda ul, üzeneñ saylawlarda qatnaşaçağın rasladı. Kamil İsxaqov, Qazannıñ Sovet rayonı Wahapov saylaw okrugında saylawğa çığaçağı turında belderde. Anıñ süzlärençä, yaña tör xakimiät, cirle üzidarä oyışmaların töze eşe saylawlardan soñ ğına başlanaçaq. Xäzerge däwlät xezmätendäge çinovniklarğa munisipal tördäge xezmätkä küçärgä mömkinlek birelergä tieş. Ämma isem üzgärüdän, eş prinsipları üzägederme yuqmı, ansın Kamil İsxaqov äytmäde.
Bikä Timerova.
