Accessibility links

Кайнар хәбәр

Mäskäw Qazannan da qartraqmı?


Här yılnı, sentäber ayınıñ berençe yäkşämbese Mäskäwdä şähär köne. Äle genä Qazannıñ meñ yıllığın bilgelägän tatar xalqı da, Mäskäwneñ Qazan bäyrämendä qatnaşqan räsmiläre dä Qazan könnären tiz genä onıta almas axrı. Bügenge “Moskovskiy komsomoles” gazetasınıñ berençe bitendä urın alğan mäsälä “Mer Mintimergä cawap birde” dip isemlängän. Nindi cawap dip mäqäläne uqısañ, Yuri Lujkov üzeneñ şähär bäyräme çığışında, Mäskäw yılğası yanında säwdä eşläre meñ yıl elegräk başlanıp kitüen äytkän. Häm anıñ süzlärennän soñ. tribunadağı beräw, xalıq arasında işetelerlek itep, “Qazan yubilee belän Şäymiev aña qatı tigän axrı”, dip beldergän. “Tatarinform” mäglümätlärenä qarağanda, Qazan merı Kamil İsxakovnıñ meñ yıllıq çaraları näticälärenä bağışlap ütkärgän matbuğat oçraşuında da şuşı tema kütärelgän ikän. Jurnalistlarnıñ, Yuri Lujkov Mäskäwneñ Qazannan yäşräk bulıp çıqqanına ütkälägän imeş , tarixçılarığıznı bezgä dä birep torığız äle dip möräcägät itkän dip äytälär digän. Yarım şayartulı sorawğa Qazannıñ xakimiät başlığı, niçek kiräk şulay yärdäm itärbez, belgänebezçä yanğan Manej urınında arxeologik qazınular däwam itä, anda qızıqlı ğına äyberlär tabılğan, xäzer alarnıñ yäşen tikşerälär, bälki Mäskäw qartayıp ta kitär dip citdi cawap birgän.

Şulay itep, yaqın arada Mäskäw berniçä yılğa qartayırmı, yuqmı, anısın qazılmalar kürsäter. Ä menä 4 sentäberdä bäyräm uñayınnan Mäskäw milli üzägendä açılğan Idel restoranı xucası Rafayıl Safin ber törkem äbi babaylarnı çaqırıp qunaq itte. Bäyräm belän qotladı. Rafayıl bu çarasına qarata olılarğa ber iğtibar kürsätäsem kilde, bezne onıttılar dip äytmäsennär äle dide. Bu bäyräm tabınına milli üzäk direktorı Änwär Xösäenov ta, Tatarstannıñ atqazanğan cırçısı Roza Xabibullina da çaqırılğan ide. Äle genä Qazannıñ meñ yıllıq bäyrämennän qaytqan Änwär Xösäenov, äbi babaylarnı Mäskäw köne belän genä tügel, Qazaznnıñ 1000 yıllığı belän dä qotladı. Ä inde Roza Xabibullina şul uq könne üzeneñ Ayqay törkeme belän meriä qarşındağı mäydanda çığış yasayaçaqların da belderep, anda “Tatarlar kilä” cırın başqaraçaqların äytte. Ä inde İdel restoranı qunaqları aldında ul tatar xalıq cırları häm mönäcätlär cırladı. Äbi babaylar bu oçraşudan bik qänäğät qaldılar häm räxmätlären belderdelär.

Näzifä Kärimova, Mäskäw

XS
SM
MD
LG