Accessibility links

якшәмбе, 11 декабрь 2016, Казан вакыты 03:33

Rusiä prezidentı xärbi diñgez köçläre başlığın wazifasınnan buşattı


Rusiä prezidentı Vladimir Putin xärbi diñgez köçläre başlığı Vladimir Kuroedovnı wazifasınnan buşattı. Räsmi säbäp itep admiralnıñ ölkän yäşe kiterelsä dä, belgeçlär fikerençä, çın säbäplär - xärbi flotnıñ möşkel xälendä. Soñğı yıllarnıñ iñ zur qazaları – Kurski su astı köymäse batuı da, uzğan ayda bulğan batiskaf qazası da – Kuroedov çorına turı kilde.

Rusiäneñ xärbi-diñgez köçlären 1997 yıldan birle citäklägän Vladimir Kuroedovnıñ urınınnan alınu ixtimalı turında, Kurski su astı köymäse batqannan soñ, 2000 yılda uq söyli başlağannar ide. Rusiäneñ tınıç çordağı iñ zur xärbi qazası näticäsendä 118 diñgezçe häläk buldı. Ämmä baş xärbi citäkçe Vladimir Putin ul çaqta admiralğa timäde. Uzğan yıl, Kuroedovqa 60 yäş tulğaç ta, ul anı yalğa cibärmäde, maxsus färman belän tağın ber yılğa wazifasında qaldırdı. Şul waqıt eçendä xärbi flotta tağın berniçä qaza buldı, uzğan ayda Kamçatkada su astı cihazı töptä elägep qaldı. Anıñ eçendäge 7 diñgezçe çit ildän kilgän yärdäm arqasında qotqarıldı.

Küräseñ, bu soñğı tamçı bulğan. 61 yäşe tulğan könne Putin Kuroedovnı yalğa ozattı. Soñğı yıllarda flotta zur qazalar buluın tanısa da, Putin flotnıñ ayaqqa basıp kilüen bilgeläde. Bäxäsle fiker. Wazifasınnan kiter aldınnan ğına admiral Kuroedov xärbi diñgez köçlärenä digän aqçanıñ 12 protsentı ğına birelü säbäple, flotnıñ tağın 20 protsenqa qısqartılaçağın iğlan itte. Rusiä saftan çığarılğan köymälären eşkärtep ölgerä almıy, yıraq portlar saftan çıqqan xärbi köymälärneñ kiräçläre belän tulğan.

Rusiäneñ xärbi belgeçe Pavel Felgengauer süzlärençä, çın wazğiät admirallar tanığannan da yamanraq bulırğa mömkin:

"Bezneñ yözä ala torğan berniçä genä köymä, berniçä su astı köymäse bar. Xäräkät itä alğannarı bar bulğannarınıñ ber öleşen genä täşkil itä."

Pavel Felgengauer süzlärençä, Koruedovnıñ kitüenä anıñ xezmättäşläre yäş tükmiäçäk:

"Rusiä flotınıda su astı köymäse admiralları östenlek itä, Kuroedov isä yar-buyı xezmäte wäkile. Alar aña, küp närsäne añlamağan keşegä şikelle, gel östän qaradı, bigräktä, berniçä su astı köymäse qazasınnan soñ."

Kuroedovnıñ warisı itep Putin Kamçatqakdağı qotqaru eşlärendä çit ildän yärdäm sorarğa täqdim itkän, xärbi diñğez köçläreneñ ştab başlığı admiral Vladimir Masorinnı bilgeläde. Ämmä Rusiä matbuğatı aña 2 yıldan 60 yäş tulaçağın iskä alıp, anı da waqıtlı citäkçe bulır dip farazlıy. Ä menä Masorin urınına ştab başlığı itep quıylğan 49 yäşlek admiral Mixauil Abramovqa kübräk iğtibar birergä kiñäş itä.

-Ali Gilmi
XS
SM
MD
LG