5 sentäber, düşämbe könne Qazan Kirmänendä Tatarstan Prezidentı Mintimer Şäymiev belän Bötenrusiä däwlät televizion häm radio kompaniäseneñ general'' direktorı Oleg Dobrodeev belän oçraştı. Monda BDTRKnıñ Tatarstan filialı bazasında Rusiä masştabları buyınça iñ zamança radiotelevizion kompleks açu turında kileşü tözelde.
Bu oçraşu küptän kötelgän bulsa da, anıñ niçek häm qayçan bulaçağın berkem dä belmäde. Uzğan yılda “Tatarstan” teleradikampaniäsen yabu turında Tatarstan prezidentı Ukazı çıqqaç, bu ğämäl milli jämägat''çelekne bik borçığan ide. Çönki 70 yıldan artıq eşläp kilgän “Tatarstan” radiosı tuqtalıp qalıp, anıñ matdi, xoquqi xäle naçarayu, ozın dulqınnarda eşläwçe häm kürşe ölkälärgä , respublikalarda işetelüçe “Tatarstan” radiosınıñ häm tatarça TV tapşırular çeltäre üzgärde.
Tıñlawçılarnıñ häm tamaşaçılarnıñ sanın bermä - ber kimetä. Kompaniä xezmätkärläreneñ qısqartu, eşsez jurnalistlarnı awır xälgä quya. Tatarstan xökümäte soñğı ber yılda BDTRKnıñ filialına äylängän bu kompaniägä iğtibarın attırdı. Matdi yärdäm kürsätü dä sizelerlek arttı. Ämma barıber Mäskäw qanatı astına küçkän kompaniä ügi xäldä qalğan ide.
Yabıq işeklär artında düşämbe kiçendä barğan söyläşülär turında räsmi mäğlümat çaraları optimistik ruxta söyläde. Qayber analitiklar fikerençä, bu oçraşunıñ Qazannıñ 1000 yıllığın ütkärgännän soñ oyıştırıluı oçraqlı tügel. Rusiä Prezidentı V. Putinnıñ Tatarstanğa, Şäymievqa uñay mönäsäbät kürsätüe Tatarstannıñ häm tatarlarnıñ Rusiädä totqan urını mäğlümat säyäsätendä dä çağılırğa tieş.
Xäzer Mäskäw kanalı belän Tatarstan reformalar qapqanına eläkkän kompaniäne ayaqqa bastıru çarasın kürälär. Här xäldä ike yaq ta menä şundıy izge niätlären kürsätergä omtıla.
Söyläşü aldınnan Mintimer Şäymiev häm Oleg Dobrodeev Qol Şärif mäçetendä häm Blagoveşçen''ye soborında buldılar. Oçraşu waqıtında Tatarstan Prezidentı Bötenrusiä däwlät televizion häm radio kompaniäseneñ general'' direktorına, anıñ urınbasarı Aleksey Malininğa Qazannıñ 1000 yıllığı istälegenä çığarılğan medal''lär belän büläkläde häm bäyräm tantanaların televidenie aşa kürsätüdä bulğan bulışlıqları öçen räxmäten belderde.
BDTRKnıñ bulışlığı metodologik formadan häm kiräkle küçerep yöreşle televizion cihazlarnı birep torudan ğibärät. Şulay uq, BDTRKnıñ “Planeta” isemle bülekçäse aşa Qazandağı bäyräm barışınnan yañalıqlar belän böten dönya tanışa aldı. Mintimer Şäymiev fikerençä, bäyräm tantanalarına äzerlek häm bäyräm çaraları yaxşı itep obyektiv yaqtırtılğan.
Şuşı uq oçraşuda Mintimer Şäymiev häm Oleg Dobrodeev BDTRKnıñ Qazandağı filialı DTRK “Tatarstan” yazmışı turında da söyläşülär alıp barğannar. Oleg Dobrodeev süzlärenä qarağanda, ber yıldan “Tatarstan” Mäskäwdän qala il buylap iñ zamança cihazlanğan filiallarnıñ berse bulaçaq. Qazandağı BDTRK filialı üseşenä aqça küçerü turında qarar qabul itelgän häm bu kompaniä öçen berençe çirattağı proekt bulaçaq.
“Monı BDTRK häm Tatarstan respublikası finanslıyäçäk”, dip belderde BDTRK general'' direktorı Oleg Dobrodeev.
Matdi çığımnarnıñ kem, küpme tüliäçäk ikänlege xäbär itelmäde. TV häm radio urnaşqan bina qayda häm niçek tözelä, yäisä iskeläre yañartılamı ikänlege dä mäğlüm tügel. Säyäsi qarar qabul itelgän konkret ğämällärne eş tärtibendä başqaraçaqlar.
M. Şäymiev ber yıldan yaña kompleks safqa basaçaq, bu yegetlär süze dip televidenie aşa belderü yasadı. Mäskäwdän kilgän Dobrodeev häm Malinin kebek yegetlärneñ süzen niçek ütälüen aldan äytep bulmıy. BDTRKnıñ filialına äylängän däwlät kompaniäse yärdämendä “Azatlıq” radiosınıñ tapşıruların retrotranslyatsiä turında süz barmıy. “Azatlıq” elekkeçä qısqa dulqınlarda häm FM 91.5 yışlığındağı Yaña ğasır radiosı kanalında retrotranslyansiälänä.Gölnaz Şäyxetdinova
