Accessibility links

шимбә, 3 декабрь 2016, Казан вакыты 12:52

Qazanda «Altın Menbär» möselman kinofestivale başlandı


Qazan kinoteatrlarında atna buyı möselman kinosın kürsäteläçäk. 5nçe sentäberdän başlap 11nä qädär başqalada «Altın Menbär» möselman kino festivale bara. Oyıştıruçılarnıñ äytüenä qarağanda, bäygegä sänğäti yuğarılıqta bulğan , qansızlıq häm doşmanlıqqa öndämägän, islam häm böyek möselmannar turındağı filmnar saylap alınğan. Bäygegä 10 il täqdim itkän 24 film çığarılğan. Annan tış, tağın 25 film konkurstan tış programmada kürsätelä. Rusiä möftilär şurası häm «İslam dönyası» teleradiokompaniäse kütärep çıqqan täqdim möselman dönyasında xuplaw taptı. Festival’dä qatnaşırğa 21 il teläk beldergän, barlığı 130 film täqdim itelgän. Äsärlärne täqdim itüçe illär arasında Qırğızstan, Rusiä, Azerbaycan, Üzbäkstan, Katar, İran kebek däwlätlär bar.

Tanılğan rejisserlar, akterlar häm sänğät ähelläre dä bu festivalgä teläktäşlek kürsätä. Jyuri räise tanılğan stenariy yazuçı Röstäm İbrahimbäkov, fesivalgä ataqlı rejisser Aleksandr Xotinenko kilep kitte, aktrisa Natalya Varley kilde. Marat Başarov häm Sergey Şakurov ta festivalgä teläktäşlek kürsätte.

Bäygeneñ jyuri ägzäläre arasında İran, Azerbäycan, Tatarstan, Başqortostan häm başqa resbublika wäkilläre kerä.

Bäygeneñ programmasında dokumetnal kino zur urın alıp tora. 5nçe sentäberdä, Qırğızstan täqdim itkän, «Gomer ozınlığındağı marofon» digän äsär, Tatarstannıñ «Kitmibez», häm «Ayaz Ğiläcev» kebek dokumental filmnar kürsätelgän. Festivalneñ ikençe könendä tamaşaçılar häm jyuri äğzäläre Azerbäycan, Litva häm Üzbäkstan rejisserları filmnarın qaradılar.

5nçe sentäber kiçendä, Qazanda möselman kino festivaleneñ tantanalı açılu tantanası buldı. Anda çığış yasağan möfti Rawil Ğäynetdin, festival’neñ isemen iskä alıp, Menbär yaqtılıqqa, izglekkä öndäwçe urın ul, dide. Festivalneñ jyuri räise Röstäm İbrahimbäkov, festival yañalığı belän tügel, islam rejisserlarnıñı eşlärenä iğtibar zur buluı belän dä, cämäğätçelekne cälep itäçäk, dide. Kino belgeçe, Kirill Razlogov, bu festival’, başqa ber qaya da kürep bulmıy torğan filmnar belän qızıqlı dip belderde.

Azerbäycan häm İran rejiserrları belän bergä festivaldä Tatarstan sänğätçeläre dä qatnaşa. Ramil Töhwätullinnıñ «Zöläyxa» digän näfis film bäygedän tış programmada kürsätelgän, İldar Yäğfärovnıñ «Küktaw» äsäre bäygegä, büläk öçen yarışa. Annan tış, festival’dä Qazan kinoxronikası studiäse, häm ayırım studiälär töşergän dokumental äsärlär täqdim itelä. Başqortstan filmnarın festival’gä Räis İsmähilov alıp kilgän. Kürşe respublika sänğätçeläre 2 näfis häm ber annimatsion filmnı täqdim itkän. Alarnı Törkiä, Başqortstan, Misır, Azerbaycan, Quşma Ştatlar häm İran rejisserları eşlägän.

Jyuri räise, Röstäm İbrahimbäkov ciñüçelär turındağı farazları belän büleşmäde. Ämma İran kinosın qararğa kiñäş itte. Festival’neñ ikençe könendä, bäygedän tış programmada, «Allahınıñ töse» dip isemlängän film kürsätelde. Filmnıñ rejisserı Mäcit Mäcdi, ber İran awılındağı ğailäne kürsätä. Suqır, invalid malay, internatta yäşägännän soñ, öyenä qayta. Anda anı, äbisennän başqa, ber kem kötmi. Änise ülgän, ätise invalid baladan qıyınsına. Avtornıñ alla turındağı fikerläre ğadi keşe yazmışları, suqır balanıñ, barmaq oçları belän allanı ezläwe aşa çağıldırıla. Film yaratu, keşeleklelek turındağı qimmätlär turında söyli. 6nçe avgust kiçendä, bäyge programmasında, Tatarstannıñ «Küktaw» häm Başqortstannıñ «Sömbelneñ cidençe cäye» digän näfis filnar kürsätelde.

Bikä Timerova.

XS
SM
MD
LG