Accessibility links

якшәмбе, 4 декабрь 2016, Казан вакыты 21:26

Täwge «Altın Menbär» tapşırıldı


"Altın Menbär"ne oyıştıruçılar möselman filmnarı öçen bu berençe şundıy festival dip belderä. Anda büläklär - altın, kömeş häm cizdän qoyılğan keçkenä menbärlär kino sänğäteneñ törle ölkälärendä bireläçäk. Moñardan tış Tatarstan prezidentı häm Mädäniat ministrlığınnan da maxsus büläklär bulaçaq. Sişämbedä kinofestivalneñ berençe büläge inde üz iäsen taptı da - dini tüzemlelek häm dinnär arasındağı añlaşu eşenä kertkän öleşe öçen täwge "Altın Menbär" "Musulmanin" filmın töşergän Vladimir Xotinenkoğa birelde. Festivaldä näfis filmnar da, alar barlığı 8, dokumental'läre dä, xätta animatsiä, yäğni multfilmnar da qatnaşa. Şulardan programmada, misal öçen, Törkiädän "Meñ dä ber kiçä", Başqortstannan "Arıslan häm Quyan" digännärne kürep bula. "Altın Menbär"gä filmnar närsägä qarap saylanğan, bu xaqta festivalneñ mödire Zaudi Mamirgov bolay di:Saylap alu komissiäse filmnarnı şundıyraq kriteriälärgä qarap aldı - anda köç qullanu, mistika bulmasqa, alar keşelär arasında doşmanlıq xisläre taratmasqa, kiresençä alarnı yaqınaytırğa häm keşeçelek qimmätlären yaqlarğa tieş" dip añlata "Altın Menbär"gä nindi filmnar saylap alınuı xaqında festival mödire Zaudi Mamirgov. Ämma festival isemendä möselman digän dä süz bar. Äye, di anıñ mödire monıñ belän kileşep, töp maqsat bulıp dönyada möselmannar xaqında urnaşqan tiskäre qaraş belän köräşü tora. Zaudi Mamirgov süzlärenä qarağanda, dönyada här çeçenne Kalaşnikov avtomatı belän küz aldına kiterälär, här äfğanlını äfyün taratuçı dip kürälär, här azerbaycanlı dä bazarda cimeş kenä sata dip uylıylar. Festivalneñ möselmanlığı, anda qatnaşqan filmnarnıñ möselmannar ğına tarafınnan töşerelüendä tügel, ä alarnıñ islam turında xaq mäğlümat taratuında, di Mamirgov: Zaudi Mamirgov

"İkençe kriteriä bulıp filmnarnıñ islam tarixı, mädäniatı, islamnıñ böyek şäxesläre turında söyläwe ide. Şuşı şartlar ütälgän oçraqta bez filmnarnı möselmannardan ğına tügel, başqa din keşelärennän dä aldıq", dip belderä "Altın Menbär" festivale mödire filmnarnı niçek saylap alu xaqında. Ä inde şular arasınnan iñ layıqlıların açıqlap, ciñüçelärne bilgeläw eşe 10 keşelek jurigä yöklänä. Anı mäğlüm azerbaycan senaristı Röstäm İrrahimbäkov citäkli häm ul inde, bäyälägändä iğtibar berençe çiratta filmneñ artistik yağına bireläçäk dip belderä: Barınnan da bigräk bez filmnarnıñ näfis yağına bäyä biräçäkbez, şunnan soñ ğına başqa sıyfatlarına da bağaçaqbız, filmnıñ närsäne yaqlawı, nindi qimmätlärne alğa sörüe bu oçraqta ikençel", di İbrahimbäkov. Möselman filmnarınıñ "Altın Menbär" xalıqara festivale Tatarstan başqalası Qazannıñ meñyıllığı qısalarında ütä häm ul anda ber atna baraçaq.

Kärim Kamal

XS
SM
MD
LG