Accessibility links

Кайнар хәбәр

Semberdä ayırım tatar sıynıfları yabıla


Uqıtuçılarnıñ awgust kiñäşmäsendä ayırım tatar sıynıfları saqlanaçaq, dip beldergännär ide. Läkin alay bulıp çıqmadı. Ana tele uqıtuçısı Zöhrä Xäbibullina xäbär itüençä, sentäberneñ 1-2sendä alar yaxşı ğına eşläp alğannar. Läkin comğa könne kiçen ayırım sıynıflar yabıla, dip iğlan itkännär.

Uqıtuçılar, ata-analar häm qayber direktorlar bu sıynıflarnı saqlap qalu öçen törle dairälärgä xatlar yullağannar. Alarda “optimizatsiä” digän matur yañğıraşlı süzneñ näq inorodetslarğa qarşı yunältelgäne äytelä häm cirle xakimiätneñ älege sıynıflarnı saqlap qalu öçen aqça bülep birü turındağı wäğdäse iskä töşerelä. Şulay uq waqıtı çiklänmägän piket oyıştıru niäte belderelä. Bälki şunıñ arqasındadır, gubernatornıñ sotsial'' mäs''älär buyınça kiñäşçese Tat''yana Sergeeva kiläse düşämbe könne uqıtuçılar, ata-analar belän oçraşu wäğdä itkän, digän xäbär dä işetelde.

Ä älegä Mäğärif departamentı kollegiäse mäktäplär byudjetına 1,5 protsent törle çığımnar öçen aqça östägän. Läkin bu aqça direktorlar qaramağında ikän. Mäsälän, İdelaryäğı rayonı mäktäplärendä atnasına 1 alıp 7 säğätkä qädär tatar telen uqıtu öçen aqça bülenä, di. Şähärneñ Lenin rayonındağı 28-mäktäp direktorı Äsgat'' Fäizev isä barlıq ayırım sıynıflarnı da saqlap qalaçağın belderde. Aña “Vıkruçivaysya sam”, digännär. “Bötereläm inde şulay”, - dide direktor.

Ä menä Zöya aryağı rayonındağı 55 mäktäptä xällär ayıruça xäwefle. Biredä berençe sıynıfqa 42 bala qabul itelgän. Şularnıñ 22 – tatar balaları. Cäy könne ük rayon avtonomiäsen oyıştıru çarasında mäktäp direktorı Vera Mozjuxinağa bu tatar balalarınnan ayırım sıynıf tuplarğa täqdim itelgän ide. Ä çınlıqta 1-nçe ike sınıfnıñ härbersendä 3 urıs, 7 çuaş, 11 tatar balası tuplanğan. Vera xanım monı balalarnı millät buyınça ayırırğa xoquqı bulmawı belän añlattı. İmeş, ul barı tik ata-analar teläge buyınça ğına ayırım sıynıflar tuplıy ala. Ä moña qädär eşläp kilgän ayırım sıynıflarnı urıs sıynıflarına quşuda ata-analar telägeneñ iskä alınmawın aqça yuqlığı belän “nigezläde”.

Ataqlı şaxmatçı Ğarri Kasparov Sember cämäğätçelege belän oçraştı. Anıñ säyäsi qaraşları Mäskäw mäğlümat çaraları aşa yaqtırtılğanğa, bu yulı anıñ “Tuğan tel” oyışması wäkile sorawına cawabı belän çiklänik. Soraw bolay quyılğan ide: “Sez permanent reformalardan barı tik “monetizatsiä” digäneneñ asılın açu belän çikländegez. Annan da xäşärät “optimizatsiä”, “munitsipalizatsiä” digännäre isä inorodetslar öçen ruxi genotsid çaraları bulıp çığa. Şähär mäktäplärendä ana telen qorıtu, awıllar mäktäplären yabu bezne watandaşlar isemlegennän sızıp ırğıta häm Sezneñ “Watandaşlar frontı” digän xäräkätegezgä kerü mömkinlegennän mäxrüm itä. Sez mondıy xälne niçek bäyälär idegez?”

Ğarri Kasparov AQŞ häm Angliä misallarında mondıy xälneñ ğäyre tabiği, xätta qırğilıq ikänlegen nigezläde.

Ayrat İbrahim, Sember
XS
SM
MD
LG