Accessibility links

якшәмбе, 11 декабрь 2016, Казан вакыты 11:14

Qazan belän Yekaterinburg arasında tarixi bäyläneşlärne çağıldırğan kürgäzmä açıldı


Sverdlovski ölkäse cirendä Qazannıñ meñyıllığına bağışlanğan çaralar däwam itä. Yekaterinburg şähäre urtasında urnaşqan töbäk muzeenda “Qazan-Yekaternburg: tarixi urtaqlıq” dip atalğan kürgäzmä açıldı. Muzey citäkçese urınbasarı Svetlana Korepanova älege kürgäzmäne Yekaterinburg belän Qazan arasında XVIII-XIX ğasırlarda uq başlanğan duslıq cepläreneñ yaqtı çağılışı dip atadı. Kürgäzmädä bik qızıqlı eksponatlar urnaştırılğan. Biredä XVIII yöz urtasında Seber häm Qazan zavodlarınıñ Yekaterinburgtağı baş idäräse kanseläriäseneñ qızıqlı dokumentların kürergä bula.

Qazan belän Yekaterinburg citeşterü ölkäsendä genä tügel, fän ölkäsendä dä xezmättäşlek itkännär. XIX yöz başında açılğan Qazan universitetı Uralğa küp kenä ğalimnär birgän. Alar arasınnan Narkiz Çupin, Anisim Kler, Aleksandr Mislavskilarnı atarğa bula. Alar Uralda xezmät itkännär, ämma Qazan belän gel bäyläneştä yäşägännär. Aleksandr Mislavskinıñ ulı Nikolay da üsep citkäç Qazanğa uqırğa kitep, şunda qalıp, zur ğalim, professor bulğan. Kürgäzmägä quyılğan eksponatlar bu turıda bik qızıqlı äyberlär söyli.

Monnan tış ta biredä unikal äyberlär küp. Menä XVIII yöz axırı, XIX yöz başında çığarılğan tatar tele däreslege. Anı Yekaterinburgta xristian ruxi mäktäpläre uqıtuçısı Morozov äfände 1847 yılda satıp alğan. Xristian dinen qabul itkän tatarlar belän söyläşü öçen, dini mäktäplärdä tatar telen öyrängännär, dip söyläde Svetlana Korepanova.

“Ural möselmannarınıñ cırları” dip atalğan, XIX ğasırda çığarılğan qalın ğına kitap Ural tatarlarınıñ ğöref-ğadätläre turında söyli. Bu ğäcäyep kürgäzmäne tağın da bayıtıp bulır ide, dide Svetlana xanım. Muzeyda Ural tatarlarınıñ bay tarixın yaqtırtqan eksponatlar bik küp. Svetlana xanım äytüençä, muzeydağı bu kürgäzmäne qararğa xalıq bik küp yöri. Kürgäzmä oktäber ayına qädär eşläyäçäk.

XS
SM
MD
LG