Accessibility links

сишәмбе, 6 декабрь 2016, Казан вакыты 21:04

Millätara kitapxanä “Qazan” qunaqların kötä


Sverdlovski ölkäse millätara kitapxanäse dä Qazannıñ meñyıllığına bağışlap küp kenä çaralar uzdırdı. Kitapxanä direktorı urınbasarı Viktoriä Arsentyeva, Qazannıñ meñellığın bilgeläp ütü san yağınnan ikençe urında torğan Ural tatarları öçen genä tügel, bar xalıq öçen dä bik ähämiätle waqiğa dip assızıqladı. Şuña kürä millätara kitapxanä bu waqiğadan hiç tä çittä qala almadı, dide ul. Yıl buyına “Ğasırlar awazı” digän isem astında biredä bik küp çaralar uzdırılğan. Ä menä bu ayda tağın ber qızıqlı oçraşu kötelä – Yekaterinburg şähärenä qunaq itep “Qazan” jurnalı redaksiäse xezmätkärlären çaqırırğa uylağannar.

Viktoriä Valeryevna äytüençä, “Qazan” jurnalın kitapxanägä yörüçelär bik yaratıp uqıylar ikän. Bay eçtälekle, matur bizäkle bu jurnal tatarlarnıñ ğına tügel, başqa millät wäkilläreneñ dä ixtiramın qazanğan. Şuña kürä, jurnalnı çığaruçılar belän oçraşu oyıştıruğa kitapxanä xezmätkärläre bik centekläp äzerlänälär. Ay urtasında udırılaçaq bu çara programmasında milli oyışmalar wäkilläre, cämäğätçelek, zıyalılar belän oçraşıp, tügäräk östäl yanında söyläşü, Sverdlovski ölkäse töbäkne öyränü muzeendağı çaralarda qatnaşu, Krasnoufim rayonı üzägendä küçmä utırış oyıştırıp, uquçılar belän tanışu qaralğan.

Bu çarağa bağışlap, Sverdlovski ölkäse millätara kitapxanäse “Ğasırlar başqalası – meñyäşär Qazan” dip atalğan kitap häm “Yekaterinburg – Qazan: Duslıq küpere” dip atalğan jurnal bastırıp çığardı. Tuqaynıñ rus telenä tärcemä itelgän “Par at” şiğere belän başlanıp kitkän kitap tarixi materiallarğa da, Qazannıñ bügenge köne waqiğaları turındağı basmalarğa da, Yekaterinburg belän Qazan arasındağı duslıq küpereneñ nıqlığın çağıldırğan materiallarğa da bik bay. Qazan qunaqların şulay nıqlap äzerlänep, dulqınlanıp kötälär Sverdlovski ölkä millätara kitapxanäse xezmätkärläre.

Fäwiä Safiullina, Yekaterinburg

XS
SM
MD
LG