Accessibility links

шимбә, 10 декабрь 2016, Казан вакыты 02:07

Prezident Yuçenko Ukraina xökümäten eşennän aldı


Ukraina prezidentı Viktor Yuçenko atnakiç Yuliä Timoşenko citäkçelegendäge xökümätne eşennän aldı. Soñğı könnärdä anda, elekke däwlät sekretare Oleksandr Zinçenkonıñ xakimiatne rişwätçelektä ğäyepläwläre säbäple säyäsi krizis tua başlağan ide.

İldä tiränäyä barğan säyäsi krizistan çığu maqsatında Ukraina prezidentı bar xökümätne eşennän azat itärgä buldı. Şuşı ğämälen ul, üzeneñ äflisun inqilabınnan soñ xökümät qarşında quyğan maqsatları häm andağı eçke qarşılıqlar arasındağı upqınnıñ tiränäyä baruı belän añlattı. Prezident Viktor Yuçenko:

Audio, Viktor Yuçenko

"Här könne min törle mäs''älälär ölkäsendä başta eçke qarşılıqlarnıñ, annarı inde citdi nizaqlarnıñ artuın kürep tordım, soñraq pärdä artında törle mäkerle uyınnar başlandı häm bu inde däwlät säyäsäteneñ nigezlären qaqşata başladı", di prezident Yuçenko atnakiç Timoşenko citäkçelegendäge xökümätne eşennän alu säbäplären añlatıp. Waqıtlı premyer-ministr itep älegä ilneñ könçığışındağı Dnipropetrovski ölkäse xakime Yuriy Yexanurov bilgelänä. Aña yaña xökümätne qoru wazifası da yöklänä. 1994-97-nçe yıllarda Yexanurov Ukrainanıñ Däwlät milke komitetın citäklägän ide. Berük waqıtta Yuçenko pänceşämbedä eşennän alınğan Yuliä Tmoşenkonıñ üz fikerdäşläre törkemendä qaluın teläwen dä äytte. Näq şunı uq Yuçenko, irtäräk üze teläp eşennän kitkän Däwlät iminlege şurası räise Petro Poroşenko turında da belderde. Kievtäge Mohilev akademiäse professorı İgor Losev süzlärençä, kilep tuğan wäzğiattä Yuçenkonıñ ällä ni saylaw mömkinlekläre yuq:

Audio, İgor Losev

"Äflisun inqilabınnan soñ xökümätneñ aşıq-poşıq qına tözelüe ser tügel, ul üz eçenä törle säyäsi ağımnarnıñ wäkillärneñ aldı häm tulayem alğanda hiç tä berdäm bulmadı. Prezident xökümätne reformalarğa häm üz tiräsendägelärgä kübräk iğtibar birergä tieş", di Kievtän professor Losev. İnde äytelgänçä, prezident xökümätne üz eşennän, ildä kiñäyä barğan xakimiat krizisı, anı rişwätçelektä ğäyepläwlär säbäple azat itte. Kierenkelek uzğan şimbädä, prezident idaräse başlığı häm däwlät sekretare Oleksandr Zinçenkonıñ urınınnan kitüe belän başlandı. Xakimiatneñ yuğarı buınnarında rişwätçelek taralu xaqında näq menä ul belderde. Zinçenko atap äytkän isemnär arasında Yuçenkonıñ yaqın köräştäşe, Ukrainanıñ Däwlät iminlege şurasın citäkläwçe Petro Poroşenko da bar ide, ul üzeneñ şul urınınnan kitüen äle xökümätne azat itkänçe ük xäbär itte. Prezident Yuçenko xakimiate citdi sınaw çorına kerde, läkin küzätüçelär moña çağıştırmaça uñay qarıy, xökümätne almaştıru ildä çın reformalar başlawğa kiterä ala dip isäpli. Kievtäge Yewro-Atlantik xezmättäşlek institutınnan Volodimir Horbax, "tazarınu omtılışı oppozitsiädän tügel, ä xakimiatneñ üzennän kilä, şuña kürä soñğı üzgäreşlär anı nığıtaçaq qına, xalıq anı kübräk xörmät itä başlayaçaq" dip uylıy:

Audio, Volodimir Horbax

Ukraina xakimiatendäge qarşılıqlarnıñ kierenkelänüen küzätüçelär martqa bilgelängän parlament saylawlarınıñ yaqınayuı belän añlata.

Kärim Kamal
XS
SM
MD
LG