Accessibility links

пәнҗешәмбе, 8 декабрь 2016, Казан вакыты 07:09

“Altın mönbär” kinofestivale däwam itä


Pänceşämbe häm comğa könnärendä dä “Altın mönbär” kinofestivale däwam itte. Kinolar 8-9 sentäber könnäre dä säğät 10nan başlanıp 21.00 säğätkä qädär “Mir” kinoteatrında kürsätelä. Anda bu könne Törkiä, Başqortstan, Mısır, Äzerbaycan, İran, AQŞtan bulğan multiplikatsion filmnar häm Britaniädän, İrannan häm Mısırdan bulğan dokumental häm näfis filmnar bardı.

7 sentäber köne bu kinoteatrda dokumental filmnardan başlanıp kitte. Anda Qatarda töşerelgän “Saray şähärenä tunnel''”, İranda töşerelgän “Adäm balaları”, Kanadada töşerelgän “Yaña cirdä, yaña tormış” dip atalğan filmnar kürsätelde. Filmnarnıñ eçtälege möselman illärendäge bügenge zaman suğışları arqasında möselmannarnıñ cäfa çikkännäre, kürgännäre, suğış qorbannarı, häm möselmannarnıñ bu turıdağı fikerläre, serb häm xorvatlar arasındağı suğış barışında Saray şähärenä qädär tözelgän tunnel'' aşa ütkän keşelärneñ, üzläreneñ qannarı belän yazılğan isemnäre turında söylägän keşelär fikerläre häm törle illärdän Kanadağa kilep yäşägän möhacir möselmannarnıñ ber cämğiät bulıp bergä yäşäwläre turındağı waqiğalar kürsätelä bu filmnarda.

Kanadada yäşägän möselmannarnıñ balalarnı tärbiäläwdä nindi qıyınlıqlar belän oçraşuları turında alar üzläre söylilär.

Festivaldä jüri äğzası Tufan Miñnullin fikere: (audio)

Azerbaycan respublikası mädäniät ministrlığınıñ kinematografiä bülege citäkçese, kinorejisser, jüri äğzası Cämil Farandjev fikere: (audio)

Ä menä ber Ufa qunağınıñ festivalne oyıştıruda Tatarstannıñ role turındağı fikere: (audio)

Jüri äğzası Dmitriy Pivovarov fikere: “Çınlap ta bez küräbez möselmannarnıñ böten cirlärdä yäşägännären. Alar Litvada da , Kanadada da. Monda häm tarixi häm etnografik häm publitsistik materiallar, alarnıñ mädäni qimmätläre bik yaxşı itep birelgän. Şunıñ öçen dä bu festival xalıqqa bik kiräk.”

Kino qararğa möselman xatın-qızlar berlege räise Älmirä xanım Ädiätullina da kilgän ide. Ul menä närsälär dide:

"Bezgä äle İslamnıñ nigezlären bik tä nıq öyränergä kiräk, xalıqqa, möselmannarğa añlatırğa kiräk, anıñ ädäp- äxlaqların köndälek yäşäw räweşenä äyländerergä kiräk ikänen bigräk tä Kanadağa yäşärgä küçep kilgän möselmannar turında töşerelgän kinodan kürep, söyenep çıqtım. Xälemnän kilgänen, inşalla, eşlärgä tırışırmın.”

Bu könne tağın İranda töşerelgän “İzge Märyäm”, “Cir” dip atalğan häm Tacikstanda töşerelgän “Zimağur” kebek näfis filmnar da kürsätelde. Kinofestival şimbä könendä dä däwam itäçäk.

Mälikä Basıyr, Qazan

XS
SM
MD
LG