Accessibility links

шимбә, 3 декабрь 2016, Казан вакыты 03:29

Qazanda törek-tatar bağlanışları xaqında söyläştelär


Qazanda bu könnärdä çit ildän kilgän qunaqlar bik küp. İnde xäbär itkänebezçä, Tatarstanda Litva respublikası könnäre ütä, İran mädäniäte belän tanışu bara. Ä menä Änqara belän İstanbuldan kilgän ğalimnär üzläreneñ Tatarstandağı kollegaları belän törek-tatar mädäni bağlanışlar xaqında fikerläşer öçen Qazanda cıyıldı. 9-10 sentäberdä uza torğan törek-tatar mädäni bağlanışları xaqındağı cıyılış Ğalimcan İbrahimov isemendäge Tel, ädäbiät häm sänğät institutında bara. Anı oyıştıruçılar arasında şuşı institut, Bötendönya tatar kongressı, törek tele cämğiäte idäräse, İstanbul universitetınıñ Törkiät institutı.

Simpoziumda şaqtıy bilgele tatar häm törek ğalimnäre qatnaşa. Comğa könne uzğan utırışta Räşit Räxmäti Arat, Abdulqadir İnan, Säğädät Şakir, Äxmät Timer, Yosıf Aqçura, Zäki Wälidi häm başqa törek tele häm ädäbiäte, tarixı ölkäsendä zur xezmät quyıp tanılğan ğalimnär turında çığışlar buldı. Alar xaqında Törkiädän kilgän Osman Fikri Sertkaya, Xämzä Zölfikär, Xakan Qırımlı, Gönäl Pultar, Tatarstannan Mirfatıx Zäkiev, Damir İsxaqov häm başqalar söyläde. Simpoziumnı açıp cibärgän Nurmöxämmät Xisamov isä, törek-tatar arasındağı mönäsäbätlär, alarnıñ tarixı häm ähämiäte turında äytep kitte.

Şimbä könne simpozium üz eşen däwam itäçäk. Çirattağı utırışta Sadri Maqsudi, Ğayaz İsxaqi, Tahir Çağatay häm alarnıñ eşçänlege turında, Mäñgär waqıfınıñ xezmäte, törek ğalimnäreneñ Altın Urda temasın yaqtırtuı turında mäğlümät alıp bulaçaq. 11 sentäberdä isä, qunaqlar Arça rayonına säfär qılaçaq.

Konferensiä barışında tağın ber qızıqlı waqiğa buldı. Cıyılışta qatnaşuçı millättäşebez Nadir Däwlätneñ Yıraq könçığıştağı tatar-başqortlarğa ni buldı digän häm Nadir äfändeneñ änise – Roqıya Däwlätkildeneñ Bar tatar xatınınıñ açı yazmışı dip isemlängän kitaplar da täqdim itelde. Alar ikese dä näq menä şuşı könnärdä genä dönya kürgän. 400 danä belän genä çığarılğan bu basmalar tatar möhacirlege belän şöğellänüçelärgä genä tügel, ä, ğomumän, kiñ qatlam uquçılarğa qızıqlı bulır.

Gölnaz İlgizär

XS
SM
MD
LG