Accessibility links

җомга, 9 декабрь 2016, Казан вакыты 01:08

Ukrainanıñ yaña xökümäte texnokrat xökümät bulırğa mömkin


Xakimiät dairäsendä korrupsiä cancalı häm üz-ara köräş sürätendä atnakiçtä Ukraina prezidentı Viktor Yuçenko Yuliä Timoşenko xökümäten urınınnan alıp, premier-ministr wazifaların Dnepropetrovski gubernatorı Yuri Yexanurovqa tapşırdı. Yaña xökümät tözü mäsäläsendä söyläşülär başlağan Yexanurov üzeneñ töp maqsatı itep totrıqlılıq urnaştırunı quydı. Qayber belgeçlär fikerençä, bu krizis näticäsendä Ukrainada texnokratlar xökümäte tuarğa mömkin.

Näq ber mäğlüm ber äytemdä şikelle - "äflisün inqilabı üz balaların aşıy başladı". Urınınnan alınğan premier-ministr Yuliä Timoşenko, İminlek wä saqlanu şurası räise Petro Poroşenko häm dä däwlät sekretare Oleksandr Zinçenko uzğan yıl axırında Kievta maydan totqanda Yuçenkonıñ iñ yaqın köräştäläre ide. Atankiç üzeneñeñ qararın añlatıp, Yuçenko äflisun inqilabı xyılların tormışqa aşıru urınına bu keşelär berdäm törkem ruxın yuğaltıp, PR belän şöğellänä başladılar, dide. Xökümät başlığı wazifaların ul üzeneñ küptänge xezmättäşe, Dnepropetrovski ölkäse xakime bulıp eşlägän Yuri Yexanurovqa tapşırdı. Çığışı belän buryat bulğan Yexanurov Ukrainada totrıqlılıq urnaştırunı üzeneñ töp maqsatı dip atadı:

"İñ möxime – ildä totrıqlılıq, ğadi keşe ildä prezident, xökümät, parlament bulğanın, xakimiät anı qayğırtqanın toyarğa tieş."

Soñğı fiker beleşügä qarağanda Ukrain xalqında xökümätkä ışanıç çınlap ta kimi barğan. Razumkov üzäge ütkärgän tikşerügä kürä august ayında cawap birgännärneñ 43%tı Ukraina yalğış yuldan bara digän. April ayında bu san 23 kenä % bulğan. Yılnıñ berençe yartısında üseş ni barı 4% täşkil itkän, uzğan yıl isä ul 14% bulğan. Razumkov üzäge citäkçese Oleksandr Lytvynenko süzlärençä, Yexanurov bu ışanıçnı qaytara ala:

"Yuri Yexanurov Ukrainada şaqtıy mäglüm keşe. 90nçı yıllar urtasında ul Däwlät milke fodnın citäkläde, xosusıylaştırular anıñ citäkçelegendä bardı. Xökümättä ul vitse-premier da, ministr da buldı. Yağni ul däwlät eşen dä, iqtisadnı da belä."

Belgeçlär fikerençä, bu wazğiättä Yexanurov premier-ministr urınına iñ qulay keşe bula ala. Oppozitsiädä aña qarata tiskäre qaraşlar yuq. Yuçenko partiäsendä bulsa da, anıñ Yuliä Timoşenkonıqı şikelle säyäsi däğwaları yuq. Ul säyäsätne çitkä quyıp, belgeçlärdän torğan texnokratlar xökümäte tözi ala. Elekke premier isä prezident belän yış qına qarşılıqqa kerä ide. Timoşenko prezidentnıñ anı çitlätü qararına ükeneç belderde:

"Bu qarar bezgä qarata bik tä, bik tä ğädelsez. Bez, berençe äflisun xökümäte, 7 ay eçendä başqa xökümätlär 14 yılda eşli almağannı eşlädek."

Qayber belgeçlär fikerençä, xäzer Timoşenko elekke dustı Yuçenkoğa qarşı köçle oppozitsiä tözergä mömkin. Razumkov üzäge başlığı Oleksandr Lytvynenko moña şik belderä, Timoşenko Yuçenko belän yänşä torıp qına dan qazandı di ul.

Kiläse yılnıñ yazında Ukrainada parlament saylawları ütäçäk. Bu saylawlarda Yuçenkonıñ "Bezneñ Ukraina"sı Timoşenko bloğı belän qulğa-qul totınıp barır dip kötelgän ide. Xäzer bu turıda onıtırğa bula. Kiresençä, alar arasında qızu köräş bulırğa mömkin.

Xalıqara reaksiägä kilgändä, Yuçenkonıñ qararına Rusiä belän Gruziä prezidentları, Quşma Ştatlar däwlät departamentı häm Yevropa Berlege xuplaw belderdelär.

-Ali Gilmi
XS
SM
MD
LG