Accessibility links

Başqortstan prezidentı Mäskäwdä eş säfärendä bulıp qayttı


Başqortstan Prezidentı Mortaza Räximovnıñ kiläçäk yazmışı turında ni genä söyläsälär dä, üz wazıyfaların ütäwen däwam itä ul. Menä 8 sintäber könne dä ul Mäskäwgä ber könlek kenä eş säfäre belän barıp qayttı. Prezidentnıñ matbuğat xezmäte xäbärenä qarağanda, Mäskäwdä Mortaza Räximov Rusiäneñ qayber cawaplı citäkçeläre belän oçraşular ütkärgän. Rusiä Prezidentı xaqimiäte citäkçese urınbasarı Vladislav Surkov häm Prezidentnıñ yärdämçese Aleksandr Abramov belän oçraşuda Mortaza Räximov Başqortstannıñ sotsial-iqtisadıy xälläre häm töbäktäge ictimaği-säyäsi wäzğiät turında söyläşülär alıp barğan. Rusiä Federätsiäseneñ iqtisadıy üseş häm säwdä ministrı German Gref häm anıñ urınbasarı Andrey Şaronov belän oçraşuda Başqortstan prezidentı şulay uq küp kenä mäsälälärne tikşergän, dip xäbär itelä. Söyläşüdä Başqortstannıñ Rusiägä üz ixtıyarı belän quşıluına 450 yıl tulu uñayınnan bäyräm çaralarına äzerlänü mäsäläläre dä qaralğan. Mortaza Räximovnıñ Mäskäwdä şulay uq Rusiä Federäl yul ağentlığı başlığı Oleg Belozerov belän oçraşuı xaqında da xäbär itelä. Ul söyläşüdä Başqortstanda yullar salu häm iskelären tözekländerü mäsäläläre buyınça fiker alışınğan häm qayber täğayın eşlär buyınça kileşülärgä kilengän. Bu xaqta da Başqortstan Prezidentınıñ matbuğat xezmäte comğa könne xäbär itte. Mäskäwgä säfäre barışında Mortaza Räximovnıñ, üzen yañadan da prezident wazıyfasında raslaw öçen, il başlığı prezident Vladimir Putin isemenä möräcäğäten tapşırğan buluı da ixtimal, digän farazlar bar. Ämma monısın inde barı tik waqıt qına kürsäter.
XS
SM
MD
LG