Accessibility links

Кайнар хәбәр

İske Kizläw tufrağı üstergän izge küñelle eşquar


Samar ölkäsendä tatar milli xäräkäte 17 yıl elek üzeneñ barlığın yuridik zat itep belgertte. Menä şul 17 yılnıñ soñğı 7 yılında milli xäräkätkä eşquarlar küpläp kilep quşılsalar, milli xäräkätneñ yul başında tatar eşmäkärlären barmaq belän genä sanarlıq ide. Menä şul siräklärneñ berse- Ğata uğlı Wazıx Möxämmätşin. Yuq, yuq. 17 yıl elek tä Samarda tatar bayları küp ide, läkin dä kemder millätçelek yarlığınnan qurıqtı, kemder saranlıqtan çittä tordı, kemder xäyläkär genä küzätep tordı, bu millätçelärne qara maşinalarğa töyäp kitärlärme, yuqmı.

17 yıl elek tatar milli xäräkäte yulbaşçıları tatar küñelenä awaz saldılar saluın, läkin dä konkret adımnar yasaw öçen matdi çığımnar kiräklege kön tärtibenä kilep bastı. Tatar mänfägatenä bersüzsez yärdäm qulın Wazıx äfände Möxämmätşin suzdı. Menä şul şäxes Samarnıñ iñ däräcäle, iñ zatlı, iñ bay “Renessans” qunaqxanäsendä urnaşqan restoranında üzeneñ 60 yäşlegen uzdırdı. Yözlägän qunaqlar arasında zur citäkçelär, sänğät keşeläre häm malquarlar Wazıx äfändegä mädxiä cırladılar. Ber genä kürsätkeç, här malquarnıñ yubileenda gubernator utırmıy. Konstantin Titov Wazıx Möxämmätşinnıñ kapitalist dustı dip äytep bula, çönki Rusiädä kapitalizm başlanuğa Titov kapitalizmnıñ äydäwçese bulsa, Möxämmätşin berençe bulıp kapitalistlarça eşkä küçte. Başqalardan ayırmalı bularaq, Wazıx Möxämmätşin baylıqnı üz astına ğına körämäde, ä eşçelären qänäğätländererlek aqça tüläde.

Wazıx Möxämmätşin – tözüçe häm ul balta ostasınnan alıp tözeleş- remont firmasınıñ general'' direktorı bieklegenä kütärelgän olpat ir.

Wazıx Möxämmätşin närsä tözesä dä berençe buldı. Ul iñ elek aqsöyäklär öçen elit yortlar saldı, könçığış çalımnarın kertep, bank binasın ölgertte. Ä bügen ul mäskäwlelär öçen original'' säwdä üzägen tözi, şul uq waqıtta yarlılarnıñ buyı citärlek bäyälärgä toraq tözü programmasın tormışqa aşıra.

Ğata uğlı Wazıx Möxämmätşin turında üz fikerläre belän “ Tuğan tel” cämğiäte äğzası Azat Nadirov urtaqlaşa:

“Wazıx Ğatawiç belän bez 1998 yıldan birle tanış. Ul milli bäyrämnär uzdırğanda maşinalar belän yärdäm itä başladı. Citäkçelär arasında tatarlar küp, läkin dä Wazıx äfände üzeneñ milli ruxı belän ayırılıp tora. Millätkä eşlägän xezmätlären sanap beterep bulmas, läkin dä ikesen äytmi mömkin tügel. Ul “Yaqtılıq” isemle mäktäpne tözep birde häm Samar Cämiğ mäsceden saldı. Wazıx äfände şundıy şäxes ki, üzara söyläşkändä- ul yomşaq küñelle keşe, xättä lirik dip äyter idem, ä menä eş buyınça planerkalarda ul bötenläy başqa keşe. Qırıs, ğädel, taläpçän, tögäl. Üze dä punktual'', keşelärdän dä şunı taläp itä. Bäxäskä çummıy, waqıtnı äräm itmi, şul uq waqıtta sügenüneñ närsä ikänen belmi.

Xäzerge waqıtta “Yaqtılıq” mäktäbenä yanqorma tözelä, yanqorması töp binadan zurraq bulaçaq. Bu cawaplı eşne dä Wazıx Möxämmätşin citäkli.”

Sez Wazıx äfände Möxämmätşin turında “Tuğan tel” cämğıäte äğzası Azat Nadirov fikeren işettegez.

Wazıx Möxämmätşinnıñ ätise Ğata abzıy bik irtä wafat bulğanlıqtan, Wazıxnı änise Bädär apa tärbiäli. Bädär apa 90-nı tutırıp mäñgelekkä küçte häm ul ğömerneñ soñğı yıllarında 4 märtäbä Xacğa barğan qarçıq. Zamanında minem üzemä küp märtäbä Bädär apa belän söyläşep utırırğa nasıyp buldı. Ul miña: “ Wazıx uqığan sıynıfta ul ber genä ätisez malay ide, küñele sınmasın dip, bar köçemne quyıp, köne- töne eşläp min anı yaxşı kienderdem, tämle aşattım, berençe bulırğa öyrättem”, - digän ide Bädär apa. Bädär apanıñ xezmäte häm tırışlığı yuqqa çıqmadı. Ğata abıynıñ häm Bädär apanıñ uğlı Wazıx Möxämmätşin 60 yäşendä dä berençelär safında, Samar şähäreneñ kürenekle tözüçese, Samar tatarlarınıñ ğorurlığı, ä milli xäräkät citäkçeläreneñ matdi teräge ul- tatar canlı Wazıx Möxämmätşin. Tatarstannıñ izge Kizläw tufrağında üskän Bädär apa Samarğa izge küñelle Wazıxnı büläk itep qaldırdı.

Şamil Bahautdin, Samar

XS
SM
MD
LG