Accessibility links

сишәмбе, 6 декабрь 2016, Казан вакыты 17:12

"Altın Mönbär" kinofestivale tämamlandı. Büläklärneñ bersen Färit Bikçäntäyev aldı


Atna buyı Qazan kinoteatrlarında möselman kinosı kürsätelde. Möselman kinosı nindi bula, digän sorawğa, atna başında oyıştıruçılar añlatmalar birde, soñınnan kürsätelgän kinoäsärlär dä bu sorawğa cawap birde. Festival direktorı Zaudi Mamirogov möselman kinosı itep, köç qullanu, qansızlıqqa öndäwçe küreneşläre bulmağan, sänğät yuğarılığında eşlängän, möselmannar häm islam din ähellären çağıldırğan kino äsärlär itep bilgeläde. Ä tanılğan kino belgeçe häm jyuri äğzase Kiril Razlogov, möselman kinosı, waqiğalar äkren genä bara torğan, keşe qıymmätlären üzäkkä quya torğan, möselmannar tormışın çağıldıruçı filmnarnı ul, dip äytte. Şundıy kino äsärlären festival’dä Tatarstan belän Başqortostannan tış, İran, Azerbaycan, Misır, Törkiä häm başqa möselman däwlät wäkilläre kürsätte.

10nçe sentäber kiçendä, «Altın mönbär» kino bäygesendä ciñüçelärne büläkläw buldı. Belgänegezçä, «Altın mönbär» räweşendäge berençe büläkne Vladimir Xotinenkoğa birdelär. Tatarstan täqdim itkän «Küktaw» filmı mömkin ciñüçelär arasında ataladı. Ämma töp büläkne, iñ yaxşı film öçen Altın Mönbärne, Azerbaycan rejisserı Aktay Mir-Kasiym aldı. Anıñ «Sixerçe» digän näfis filmı, 2nçe ğasır başı xälläre, sixerçe yarlığı tağılğan tabip turında söyli. Şuşı äsärdä töp rol’ne başqarğan Ayan Mir-Kasiym, oyıştıruçılarnıñ maxsus bülägen aldı.

İñ küp büläklär İran wäkillärenä birelde. «İzge Märyäm» isemle näfis filmnıñ stenarie avtorı häm «Märyäm» rolen başqarğan aktrisa ikese dä fesitval’ bülägenä layıq dip tabıldı. Juri räise Kirill Razlogov, axırğı matbuğat oçraşuında tä’sirlär belän büleşkändä, «İzge Märyäm» kinosın ayıruçı bilgeläp ütte. Bu äsär filmnıñ simvolı bula ala, ul dinnärneñ ber bersenä totaşuın häm aralaşuın kürsätä, dide. Filmda, Xristos, Ğäysä päyğämbär änise, İzge Märyäm tarixı surätlänä. Festival’dä şulay uq, «Adäm balaları» İran dokumental’ kinosı häm «Tınıç zaman şartlawları» digän kinonıñ operatorı büläklände.

Tatarstan häm Başqortostan wäkillärenä dä säxnägä kütärelergä turı kilde. Tatarstannıñ «Küktaw» filmı, töp röle başqarğan öçen Färit Bikçäntäyev «Altın Mönbär» aldı. Säxnägä çıqqaç, ul min akter tügel, min rejisser, dip aqlanırğa tırıştı häm räxmätlären belderde. Başqortostan täqdim itkän annimatsion film, «Arıslan häm Quyan» mul’tfilmınar arasında ciñep çıqtı. Ä qısqa mertajlı näfis filmnar arasında «Tönlä mömkin» isemle äsär şulay uq, «Altın mönbär»gä layıq buldı.

Tatarstan kinematografiä berlege räise Zöfär Boxaraev, «Azatlıq» radiosı xäbärçeseneñ ni säbäple bäygegä Tatarsannan 2 genä näfis film quyıluı turındağı sorawğa bolay cawap birde.

Audio.

Bezneñ barı 2 näfis film töşerlgän dä. Zöläyxä häm Küktaw. Festival’ uylandıra, ni säbäple İran 4 büläk alıp kitte, nigä Başqotorstanğa 2 mönbär sını kitte. Nigä bezgä 1 genä büläk eläkte. Kübräk kino bulğan sayın, kübräk fesitval’lär häm büläklär bulaçaq. Bolar üz çiratında Tatarstan kinematografiäsen üsterergä yärdäm itäçäk.

Festivlaneñ direktorı Zaudi Mamargov äytkänçä, festivl’ne kiläse yılda ütkärergä dip Başqortstan häm İran teläk beldergän. Ämma kiläse yılğa festival’ Mäskäwdä ütäçäk. Ä bäygeneñ Qazanda ütkärelüe, başqalınıñ 1000 yıllığı belän bäyle.

Bikä Timerova

XS
SM
MD
LG