Accessibility links

“Mäxäbbät turında riwayät”


Uzğan comğada Qazannıñ Kärim Tinçurin isemendäge däwlät drama häm komediä teatrı üzeneñ yaña sezonın açıp cibärde. “Mäxäbbät turında riwayät” isemle premyera belän teatr üzeneñ uzğan sezonın tämamlağan ide. Yaña sezonnıñ açılışında da tamaşaçı törek dramaturgı Nazıym Xikmätneñ 1948-1952 yıllarda yazılğan häm teatrnıñ baş rejisserı Räşit Zähidüllin tarafınnan säxnäläşterelgän “Mäxäbbät turında riwayät” spektakleneñ şahitı buldı.
Spektaklneñ üzägendä – mäxäbbät. Avtor fikerençä, çın keşelär nur çığanağı, şäm kebek bulalar, ğömerlären yanıp, başqalarğa yaqtılıq birep uzdıralar. Alar – äsärneñ töp geroyları Färhad, Şirin kebek zatlar. Waqiğa Arzın qalasında bara. Soltanbikäneñ bertuğan señlese Şirin 40 kön urın östendä yata. Señlesen awırudan qotqaruçığa Soltanbikä xätta 40 ilen dä birergä äzer bula. Läkin barısı da awıru aldında köçsez bulıp çığalar. Soñraq ber yat keşe genä Şirinnı awırudan azat itäçägen äytä, läkin monıñ öçen Soltanbikä üzeneñ maturlığın qorban itärgä tieş. Señlese xaqına Soltanbikä bu şartqa da künä häm Şirin terelä. Yazmış Şirin belän Soltanbikäne Färhad isemle saray bizäkçese belän oçraştıra. Apa belän señel bu çibär yegetkä ber kürüdä ğaşıyq bulalar. Färhad tä Şirinnıñ güzällegen kürep tañ qala. Färhad belän Şirin arasında mäxäbbät utı qabına, bergä bulır öçen ğaşıyqlar qaçıp kitärgä mäcbür bula. İke bertuğan arasına yäşen utı töşä. Läkin axırda Soltanbikä Färhadnıñ señlese belän bergä qaluına rizalıq belderä. Tik ber şart belän. Älege şartnı ütäw öçen ğaşıyqlar distä yıllarğa ayırılırğa tieş.
“Mäxäbbät turında riwayät” spektakle aq şığır räweşendä kürsätelä. Spektakl''ne quyğan Tinçurin teatrı baş rejisserı Räşit Zähidüllinnı äsärneñ bu şiğri üzençälege qızıqsındırğan da. Spektakl''dä töp rol''lärne Tatarstannıñ atqazanğan artistları Cämilä Äsfändiärova, Şamil Şämsetdinov, İrek Xafizov, Aygöl Äxmätova häm Xaris Xösnetdinov başqara. Artistlarnı tamaşaçılar tulı zal belän qarşı aldı. Bik yaratıp qaradı.
Şulay da “Mäxäbbät turında riwayät” spektakleneñ töp maqsatı ğaşıyqlar qissası ğına tügel, ul şul uq waqıtta Watanğa, üz xalqıña, tormışqa qarata ixlas yaratu xaqında da.

Albina Zäynulla
XS
SM
MD
LG