Accessibility links

якшәмбе, 4 декабрь 2016, Казан вакыты 11:24

Tatarstan saylawlarına Ukraina küzätüçeläre kiläçäk


Rusiäneñ qayber subyektlarındağı okruglar buş qalğan, çönki saylanırğa kandidatlar yuq ikän. Alardan ayırmalı bularaq Tatarstanda barlıq okruglarda da kandidatlar belän tulğan häm alar inde terkälgän. Bu xaqta “Tatmedia”da uzğan oçraşuda Tatarstan Saylaw komissiäse räise Anatoliy Fomin belderde. Häm Tatarstan xalqı saylawlarğa härdaim bik cawaplılıq belän qaradı dip bilgeläp uzdı. Şuña da qaramastan küp kenä xalıq älege saylawnıñ asılın añlap citkermi. Kübese yaña xakimiät başlığın saylaw dip qabul itä.

16 oktäberdä uzaçaq saylawlarda qatnaşır öçen awıllardağı okruglarda bereşär genä kandidat bar. Ä menä Qazanda kandidatlar köndäşlek zur. Ber urınğa 4-5 keşe. 50 mandatqa 221 kandidat terkälgän.

Şulay uq Çallı belän Älmättä dä saylawda qatnaşırğa tezläwçelär ber urınğa berniçä dip belderde Saylaw komissiäse räise.

Saylawlarda qatnaşırğa etläwçelär terkälü öçen yä imza cıyarğa tieşlär ide, yä 30 meñ aqça kertergä. Aqça birüçelär az buldı dip xäbär itelde matbuğat oçraşuında. Kübese imza tapşırğan. Ul okrugtağı xalıqnıñ 1 protsentı bulırğa tieş. Bu isä üz-üzen kürsätüçe kandidatlarğa ğına qağıla. Ä menä törle firqälärdäge kandidatlarğa aqça da tülise, imza da cıyası yuq. Ğomumän saylawlarda törle firqälärdän kandidatlar terkälgän. Alar arasında“Berdäm Rusiä”, “КПРФ”, “ЛДПР”, “Tormış partiäse”n atap uzdı Anatoliy Fomin. İctimaği xäräkätlärdän “Tatarstan Yaña Ğasır” bar. Şunısı qızıq, kandidatlarnı Üzäk saylaw komissiäse terkämägän. Alar üzläre kürsätelgän okrugqa üzläre barıp terkälgän. Ğomumän böten mäs'älälär munitsipal' berämleklärdä xäl itelä. Ä Saylaw komissiäse saylawlarnı qanunnarğa turı kilü-kilmäwen genä tikşeräçäk. Xäzerge waqıtta Tatarstanda 4 meñ saylaw komissiäse oyıştırılğan.

Bügenge köndä saylawlarda qatnaşuçı Tatarstannıñ rayon häm şähär başlıqları qanun buyınça yalğa kitkännär. Tatarstan rayonnarı başlıqlarınıñ härqaysı saylawda qatnaşaçaq. Ä Qazanda barı şähär merı Kamil İsxakov häm Waxitov rayonı başlığı Räfis Borhanov ğına kandidat itep terkälgän.

15 sentäberdän kandidatlarnıñ massaküläm mäğlümat çaralarında öndäwläre başlanaçaq. Bu saylawlarda kandidatlar sanı bik küp bulaçaq. Şul säbäple televidenie-radioda efir waqıtı citüe şikle. “Alar kübräk saylaw turında ğomum mäğlümat birer, ä menä cirle häm respublika gäzitläre kandidatlar belän tanıştırır”, - dide Anatoliy Fomin.

Saylawğa kilüçelär sanı xalıqnıñ 20 protsent bulsa şul citäçäk häm saylawlar uzğan sanalaçaq.

Tatarstanğa saylawlarnı küzätergä Ukrainadan wäkillär kiläçäk ikän. Başqa çit illärdän küzätüçelär kilergä älegä teläk beldermägännär.

Landış Xarrasova.

XS
SM
MD
LG