Accessibility links

җомга, 2 декабрь 2016, Казан вакыты 21:08

Quşma Ştatlar Süriäne ğisyançılarnıñ Ğiraqqa ütep kerüenä çik quyarğa çaqıra


Amerikan räsmiläre Süriäne ğisyançılarnıñ Süriädän Ğiraqqa ütep kerüenä yul quyunı tuqtatırğa çaqıra. Quşma Ştatlarnıñ Ğiraqtağı ilçese Zalmay Xälilzad, bezneñ Süriägä qarata tüzemlegebez betep kilä, bu uñaydan çaralar kürelergä mömkin dip kisätte. Ul arada amerikan häm Ğiraq köçläre Tal Afar qalasında kontrol urnaştıru tırışlığın däwam itä. Bu qala Süriädän ütep kergän çit il suğışçılarınıñ nığıtması sanala.

Quşma Ştatlarnıñ Ğiraqtağı ilçese Zalmay Xälilzad ğisyançılarnıñ çik aşa Süriädän Ğiraqqa ütep kerüen tuqtatu öçen räsmi Dimäşqnı çaralar kürergä çaqırdı. Düşämbedä Washingtonda jurnalistlar belän oçraşıp Xälilzad, bezneñ tüzemlek betep kilä, Ğiraqlılarnıñ da tüzemlege betep kilä, Dimäşqqa qarar qılırğa waqıt citte, Äl-Qaidä belän başları butalğan yäşüsmerlärneñ Söğüd Ğäräpstanınnan, Yämännän, Tönyaq Afrikadan Dimäşq hawa alanına kilüenä Süriä çik quyarğa tieş, dide.

Süriägä qarata nindi çaralar kürergä cıyınğanın amerikannar älegä açıqlamıy. Xärbi köç qullanu öçen Berläşkän Millätlärgä möräcäğät itü niäte dä barmı digän sorawğa Xälilzad älegä ber çara da kire qağılmıy dide.

Süriäneñ Washingtondağı ilçese İmad Mostafa Xälilzadnıñ ğäyepläwlären 100% safsata dip atadı. Anıñ süzlärençä, elegräk Dimäşq amerikan häm Ğiraq räsmilären bu mäsälädä utırıp söyläşergä çaqırğan bulğan, ämmä cawap almağan.

Ul arada amerikannar tarafınnan xuplanğan Ğiraq köçläre çik buyındağı Tal Afar qalasında iminlek täemin itergä tırışa. Düşämbedä, xärbi operatsineñ 3nçe könendä anda Ğiraq premier-ministrı İbrahim Äl-Cäğfäri bulıp kitte:

"Bu säfär qalanı terrorçılardan arındıru maqsatı belän başqarılğan xärbi operatsiä waqıtına turı kilde. Alar bu qalanı terrorçılıq ürçetü urını itmäkçe, çönki ul Süriä çigendä urnaşqan, ğisyanıçlar şunnan ütep kerä. Şunısı quanıçlı – min xärbilärdä kütärenke rux kürdem, alar tınıç xalıqqa zıyan kitermäskä, barı tik doşmannı yuq itergä tırışa."

Ğiraq komandirları äytüençä, uzğan şimbädä höcümnär başlanğannan birle, Tal Afarda 200läp ğisyançı yuq itelgän. Alar barlığı 300-500läp bulğan, kübese höcümnär aldınnan şähärdän çığıp kitkän. Düşämbedä Ğiraq armiäse berençe xärbien yuğaltuın xäbär itte, monnan tış tağın 6 sivil keşe ülgän dielä. 5 meñ Ğiraq häm 3 meñ-yarım amerikan xärbiläre utqa totılğan bu qalanı tentep çıqqannan soñ anda bomba şirkäte, cir astı yulları, qoral saqlanmaları tapqan. 200 meñle Tal Afarnıñ 90% xalqı qala çitendäge çatır şähärçekkä kitep sıyınğan.

Washington elekräk tä Süriäne Ğiraq belän çiklären nığıtırğa öndäp kilde, läkin ul çaqta Süriäneñ "yarar" digän süze belän qänäğät ide. Läkin soñğı waqıtta Tal Afar tiräsendä ğisyanıçlar xäräkäte äwzemlängäç, Washingtonda da tüzemsezlek sizelä başladı.

Uzğan yıl dikäberdä ük, Ğirarqnıñ ul çaqta waqıtlı prezidentı Ğazi Äl-Yawir Süriäne, xökümät aqçasın alıp qaçqan eleke Baath partiäse räsmilärenä sıyınu birüdä ğäyeplägän ide. Äl-Yawirnıñ iminlek kiñäşçese äytüençä, uzğan yıl Äl-Falluca qalasın alğanda Baatçılar belän ğisyançılar arasında aqça bäyläneşe bulu açıqlanğan. Süriä xökümäteneñ bu turıda berni belmäwen küz aldına kiterü qıyın, di ul.

-Ali Gilmi
XS
SM
MD
LG