Accessibility links

шимбә, 10 декабрь 2016, Казан вакыты 17:38

Eşläp aşarğa kiräk


Tatarlar qunaq aşı qara qarşı dip äytsälär dä, küräseñ, başqa xalıq monı añlap citkermi dä, añlarğa telämi dä. Qazan tantanalarına meñärlägän qunaqlar kilde. Alarnıñ däräcäläre dä, töbäkläre dä törle. Räxmät äytep kitkännäre dä buldı. Qaytqaç könläşep yatuçıları da yuq tügel. Qayberäwlär, nigä Qol Ğäliğä tatarlar häykäl quya, ul bit bezzeke dip qıçqırsa, beräwlär. Nigä Tatarstanğa Mäskäw şul qadär aqça birä dip oran sala. Oleg Bogomolov – Kurgan ölkäse gubirnatorı soñgılarınnan. Ul da, Rusiäneñ başqa gubirnatorları kebek ük, Qazan tantanalarında bulğan. Oşağan aña tatar qunaqçılığı. Uralpolit säxifäse şulay dip yaza. Qazan xalqı öçen küñel şärifläre tulıplar ğına kitkän dä, tik menä üz töbäge, Kurgan ölkäse xalqı iskä töşep kenä, bäyräm xislärennän aynıtıp cibärgän. Oleg Bogomolov, Qazan bäyrämenä birelgän 3 milliard dollar aqçağa üz ölkäsen 8 yıl yäşätä ala ikän. Tik menä Mäskäw şul qädär aqçanı Kurganga tügel, ä Tatarstanğa birä - gubernatornıñ eçen poşırğanı şul. Şunıñ belän şul da anısı, näticäse dä bar. Gubirnator, Mäskäw aqçanı ğädel bülep birmi di. Yäğni, Abdulla Mäskäügä biş sum salım cibärä, şunıñ ber sumın ala. Ä İvan dädäy ber sum salım cibärä, şunıñ qädär kire qaytuın da teli. Menä Oleg Bogomolovnıñ xıyalı. Başqortstan prezidentı da, Qazan tantanalarınnan qaytqaç uq, Başqortstannıñ Rusiägä quşıluınıñ 450 yıllığın zur itep bäyräm itäbez, xalıq öçen kiräkle obyektlar tözibez, mişura ul qoyıla da betä dip belderde. Qazan yaqlarına taba qarap. Yäğni, Qazannıñ meñ yıllığın ul mişura diebräk bäyläde. Eş närsädä soñ?

Qunaqlar meñ yıllıqnı tantanalar dip kenä añlap kitkännär disäñ inde. Bulmas, täcribäle keşelär bit. Kürgännärder, Qazan bötenläy diärlek yañardı. Distä meñlägän ğailä yaña fatirlı buldı. Buşqa. Küpme sotsial' obyekt tözelde. Cämäğät, meñ yıllıqnı Qazan yulların tözätü öçen genä bulsa da oyıştırırğa kiräk ide. Bolar, böten qunaqlaw, tözeleş häm ällä küpme başqa äyberlärne isäpkä alıp 60 milliard rubl'gä töşkän. Häm ul tantanalar oyıştıruğa ğına tügel. Tantana ul eşlängän eşlärgä xisap qına bit. Äle ul 60 milliard rubl'neñ dä Mäskäwdän kilgän aqçalar ğına tügel. Respublika aqçaları da, Qazannıñ üzeneke dä, şäxsi eşmäkärlärneke dä. Mäskäwdä birde. Maxsus programmalar nigezendä. “Qazan üzägeneñ tarixi öleşen saqlap qalu häm üsterü” dip atalğan programma bar ide. Şuña Mäskäw 30 milliard rubl' birde. Döres, Qazan üzägeneñ tarixi öleşe niqädär saqlanğandır –başqa mäs’älä. Däwlät dumasında qabul itelä mondıy federal' programmalar.

Ä Flera Zıyätdinova - Dumanıñ elekkege, xäzer Tatarstan parlamentı deputatı isä, Tatarstan Mäskäwgä küçergän aqçağa, salımnarğa 5-6 Tatarstannı totıp bula di. Kurgan ölkäse salım itep Mäskäwgä küçergän aqçağa niçä Kurgan ölkäsen totıp bulu turında süz barmıy.

Şulay bulğaç. Tatarstan Rusiä kesäsenä kermi, ä üz kesäsennän çıqqan aqçalarnıñ şaqtıy az külämen genä, federal' programmalar arqasında alıp bäyräm itä.

Ä Qazanda meñ yıllıq tözeleşlären sanamağanda, tantanalar ğına küpme summağa töşte soñ? Meñ yıllıqnı ütkärü komitetı cawap birmi.

Bez andıy mäğlümatnı birmibez(Telefon trubkasın taşlıy)

Bu komitetnıñ baş buxgalterı Tamara Naskova buldı. Şul uq komitetnıñ tağın ber, isemen atarğa telämägän xezmätkäre, törle imeş-mimeşlärgä çik quyığız inde, äytegez nindi summağa töşkänen digän sorawğa cawapnı başqa cirdän ezlärgä täqdim itte.

- Kemnän işettegez, şulardan açıqlağız.

RC. Sez bit, Mäğlümat çaraları turındağı qanunnı bozasız, mäğlümat birmiçä.

- Härkemgä bit inde küpme aqça tuzdırılğannı äytep torıp bulmıy

Niçek kenä bulmasın, zakonnı belälärme, yuqmı, äytälärme summasın, yuqmı, açıq ber äyber. Tatarstan Kurgan ölkäse xisabına da, başqa töbäklär kesäsenä kerep tä bäyräm itmäde. Tatarstan Mäskäwdän üzenä tieşlesen, xäläl aqçanıñ federal' byudjetqa tartıp alınğanın şulay uq xäläl yullar belän qaytarıp aldı. Älbättä barısın da tügel. Abdulla kübräk eşlägängä İvan dädäyneñ küze qıza. Eşläp aşarğa kiräk dilär mondıy wäzğıätne küzätep baruçı milli xäräkät wäkilläre. Yäğni Abdulla fikerdäşläre. Eşläp aşarğa kiräk.

Räfis Cämdixan

XS
SM
MD
LG