14 oktäberdä Tatarstan premyer-ministrı Röstäm Miñnexanov respublika rayonnarında bulıp qayttı. Ul Apas, Kama Tamağı, Täteş, Bua, Yuğarı Oslanda uraq eşläreneñ barışı, rayondağı xällär belän tanıştı, Bua şikär zavodında buldı. Respublikada urıp-cıyu eşläre däwam itä. Tatarstan qırlarındağı börteklelär uñışı inde cıyıp alındı disäñ dä bula. Xäzer isä bäräñge, çögender kebek uñışnı cıyu bara. Qayber cirlärdä qır eşlärendä awıl xucalığı xezmätkärläre genä tügel, mäktäp uquçıları da qatnaşa. Alar eşlägän arada, respublikanıñ Fän häm mäğärif ministrlığında uquçılarnı aşatu mäs’äläsen tikşerälär. Çärşämbe könne şuşı temağa bağışlanğan brifingta jurnalistlarğa balalarnı köngä niçä sumğa niçek aşatırğa ikäne xaqında söylädelär.
Çärşämbedä Qazan häm Tatarstan aviakompaniäläreneñ direktorlar Şurası utırışı uzdı. Anda älege aviaşirkätläreneñ kiläçäkkä eş plannarı tikşerelde. Ä Tatmedia agentlığında Tatarstannıñ iñ yaxşı keşeläre digän jurnalistlar bäygesenä näticälär yasaldı.
Bilgele bulğança, 15 oktäberdä 1552 yılda Qazannı yawlap alğanda şähit kitkän babalarıbıznı iskä alu çarası uza. Qazanda aña äzerlek inde başlanıp ta kitte. Bu xaqta Azatlıq radiosına milli xäräkät wäkilläreneñ berse Yunıs Kamaletdinov xäbär itte.
Gölnaz İlgizär
