Accessibility links

дүшәмбе, 5 декабрь 2016, Казан вакыты 21:43

Ukrainadağı Säyäsi Krizis Yuçenko Häm Timoşenko Aarasında Qırıs Belderülär Yasaw Belän Däwam İtä


Ukrainadağı säyäsi krizis äflisun inqilabınıñ ike kürenekle citäkçese - prezident Viktor Yuçenko häm elekke premyer Yuliä Timoşenko arasındağı mönäsäbätlärneñ şaqtıy kierenkelänüenä kiterde. Başta şäxsi doşmanlıq telämäwen äytkän prezident Yuçenko xäzer Timoşenkonı xökümät çitäkçese urının yaman maqsatlarda faydalanuda ğäyepli häm anıñ xökümäten eşennän alu "namus mäs''äläse" ide dip belderä.

Uzğan atnada xökümätne eşennän alğannan birle şuşı sişämbegä qädär prezident Yuçenko Yuliä Timoşenko belän talaşırğa telämäwen belderep kilgän ide. Äflisun inqilabı ideallarına kire qaytığız häm bez sezne yañadan xökümättä kürergä äzer torabız - prezident Timoşenko häm anıñ tarafdarlarına şundıy işarä cibärgäläp tordı. Ämma elekke premyer häm Yuçenkonıñ mäydandağı töp berektäşe moña, inqilap idealların min tügel, prezident üze sattı dip belderde häm bu Ukrainadağı ike säyäsi pählewan arasında inde qırısraq süzlär belän almaşuğa kiterde.

Mäydannıñ yözenä äylängän Timoşenko prezident Yuçenkonı äxlaqi bölgenlekkä töşüdä ğäyepläde, ul rişwätkä batqan ber uç eşmäkärne ikençesenä genä almaştırdı dip, Kuçma çorındağı şikle xosusilaştırularnı tikşerü qayda, Yuçenko monı wäğdä itkän ide bit, digän soraw quydı. Moña inde prezident qatıraq cawap birergä buldı. Eşennän kitüe belän şuşı krizisnı başlap cibärgän Oleksandr Zinçenko, yuğarı xakimiattä rişwätçelek kiñ taralğan digän ğäyepläwlär belän çıqqan ide, Viktor Yuçenko monıñ dälilläre bulırğa tieş dip belderä:

"Şundıy ğäyepläwlär yasağan keşelär bar wäzğiatne dä, bar xaqiqätne açıqlaw öçen xoquq saqlaw xezmätlärenä yardäm itärgä tieş. Ägär dä alarda qaqşamas faktlar bar ikän häm alarnıñ süzläre ğadi populizm tügel ikän, ul mäğlümat namuslı räweştä xoquq saqlaw xezmätlärenä tapşırılırğa tieş", di Ukraina prezidentı.

Häm Yuşenko xäzer üz dälilläre belän çığa - alar Timoşenkoğa qarşı yünälderelgän. Prezident elekke premyernı, üzeneñ şul yuğarı urının, Berläşterelgän Energiä sisteması şirkäteneñ millard yarımlıq burıçın sızıp atırğa tırışu öçen faydalanuda ğäyepläde. 90-nçı yıllarda Timoşenko üz ire belän şul şirkätne citäklägän ide. Timoşenko xökümäte mäydandağı yuğarı ideallarğa tügel, ä astırtın intrigalarğa nigezlänep eşläde, dip belderä prezident Yuçenko.

Kievtäge äflisun inqilabı turında kitap yazuçı Askold Kruşelnitski fikerençä, Timoşenko belän Yuçenko arasındağı suşı soñğı tartqalaşu artında alarnıñ iqtisadi säyäsättä törle qaraşlarğa nigezlänüe yata:

"Bäxäs üzägendä ildä xosusilaştırunı yañadan ütkärü mäs''äläse yata - bıltır, äle prezident saylawlarına äzerlek azağında uq Viktor Yuçenko "däwlätläşterü" häm "xosusilaştıru" süzlären yaratmawın äytsä, Yuliä Timoşenko baştan uq, Kuçma çorında ütkärelgän 3 meñläp xosusilaştıru oçrağın yañadan tikşerergä teläwen belderep quyğan ide", dip añlata Ukrainadağı säyäsi krizis tamırların Askold Kruşelnitski.

Kärim Kamal
XS
SM
MD
LG