Accessibility links

Tatar kitabın uquçı barmı?


Qazannıñ meñyıllığınnan soñ şähärdä tözelgän matur binalar, yaxşı yullar, metro ğına qalmadı. Bäyräm aldınnan şaqtıy ğına qızıqlı, matur, sıyfatlı kitaplar dönya kürde. Alar arasında äybät qäğäzdä, matur, tösle itep çit ildä näşer itelgännäre dä, üzebezdä bastırılğannarı da, bay eçtälekle, läkin artıq yaltırawıqlı bulmağannarı da bar. Bäyäläre dä törleçä alarnıñ. Mäsälän, Rawil Buxaraevnıñ Skazaniya o Kazani 3 meñ sum tiräse tora. Ä menä Qazannıñ Mäğärif näşriätendä dönya kürgännäreneñ bäyäläre 30-50 sumnan başlana. Bigräk tä tatar kitaplarınıñ bäyäläre zur tügel. Läkin şuña da qaramastan, alarnı satıp aluçılarnıñ, alarnı uquçılarnıñ sanı küpme soñ... Şähärneñ meñyıllığına törle cirlärdän kilgän millättäşlärebez dä tatar telendäge kitaplarğa ällä ni zur iğtibar kürsätmägän. Ä bit tatar telen latin imlasına qaytarmawnıñ ber säbäbe itep, Tatarstannan çittäge millättäşlärebezneñ tatar telendä näşer itelgän kitaplarnı uqıy almayaçağı, yäşlärneñ kirill xärefläre belän basılğan zur, bay tatar ädäbiätennän mäxrüm qaluı ide.

Tatarstannıñ Mäğärif näşriäte citäkçese Mödärris Wäliev süzlärenä qarağanda, bügenge köndä tatar kitapların satu ber dä ciñel tügel, alarnıñ eçtälekle, qızıqlı, xätta oçsız bulularına da qaramastan. Mödärris Wäliev üzlärendä näşer itelgän basmalarnı uquçılarğa citkerü öçen närsä eşlägännäre turında da söyläde.

Bez ber kitap kibetenä, üzebezneke bulmasa da, Mäğärif näşriäteneñ kitap kibete digän isem eldek. Anda keşe kerep, berär kitap bulsa da alıp çığıp kitär, dip. Şulay uq üzebezneñ näşriät binasında ber bülmädä basmalarıbıznı satabız, bik oçsız, näşriät bäyäsennän. Tatar matbuğatında da üzebezdä dönya kürgän basmalar xaqında keşelärgä yazarğa tırışabız

Çınnan da, Mödärris Wäliev alda äytep kitkän näşriätneñ üz kibetendä, mäsälän, küptän tügel genä dönya kürgän Tatarı u sebya doma digän kitap 35 sum tora. Ä menä Nota dip isemlängän kitap kibetendä anı inde 60 sumğa täqdim itälär.

Tatar kitabın tanıtu, alarnı uquçılarğa yaqınaytu yünäleşendä tağın nilär eşlänelä soñ... Şuşı atnada ğına Tatarstan-Yaña ğasır kanalınıñ Xäyerle irtä, Tatarstan tapşıruında Kitap kiştäse digän yaña rubrika efirğa çığa başladı. Bu xaqta rubrikanıñ alıp baruçısı, Bötendönya tatar kongressı räiseneñ berençe urınbasarı Rinat Wäliullin söyli.

Min kitap kibetlärenä kergäç, bik aptırıy idem nigä tatar kitapları yanında keşelär, satıp aluçılar yuq ikän dip. Häm monıñ säbäben älege basmalar xaqında mäğlümät citmäw belän añlata idem. Şuña da Ministrlar kabinetınıñ tellärne üsterü bülege bäyge iğlan itkäç, anda Kitap kiştäse digän tapşıru ideyasın täqdim itte. Minem ideya grantqa iä buldı. Şul aqçağa Xäyerle irtä, Tatarstan tapşıruında ber rubrika efirğa çığa başladı. Anıñ qısalarında min tatarça ğına tügel, ä ğomumän tatarğa qağılışlı kitaplar belän tanıştıru küz aldında totam. Kiläçäktä, waqıt häm finans mömkinleklär bulsa inde älbättä, min anı tulı qanlı ber tapşıru itep eşlämäkçemen

Şulay itep, tatar kitapları basılmıy tormıy, alarnı xalıqqa tanıtu buyınça da eş alıp barıla. Läkin kitaplarnı satıp aluçılar, alarnı uquçılarnıñ sanı ğına ällä ni artmıy. Bigräk tä, yäşlär arasında. Şuña da, kitaplarnı uquçılarğa yaqınaytu mäs’äläse haman da açıq qala birä.

Gölnaz İlgizär

XS
SM
MD
LG